Qyzylorda oblysynda eki adamnyń ólimine sebepker bolǵan kólik júrgizýshisi sottaldy

<p>QYZYLORDA. KAZINFORM - Qyzylorda oblysynda jol-kólik oqıǵasyn jasap, eki adamnyń ólimine sebepker bolǵan kólik júrgizýshisi bes jylǵa bas bostandyǵynan aıyryldy.</p>

Oqıǵa byltyr 26 maýsymda Qarmaqshy aýdany aýmaǵynda boldy. Sottalýshy «Shymkent-Samara» tas joly boıynda kólik quralyn basqaryp kele jatyp, joldyń qarsy júrý bóligine shyǵyp ketken.

Saldarynan qarama-qarsy baǵytta óz jolymen kele jatqan kólikpen soqtyǵysqan. Jol-kólik oqıǵasynan qarsy baǵyttaǵy kóliktiń júrgizýshisi men jolaýshysy kóz jumǵan.

«Bul boıynsha Qarmaqshy aýdandyq sotynda QR Qylmystyq Kodeksiniń 345-babynyń 4-bóligi boıynsha qylmystyq is qaraldy. Sot otyrysynda sottalýshy taǵylǵan aıypty moıyndady. Jasaǵan is-áreketi úshin ókinip, marqumnyń týystarynan keshirim surady. Sot úkimimen ol 5 jyl merzimge kólik quralyn júrgizý quqyǵynan aıyrylyp, 5 jyl merzimge bas bostandyǵynan aıyrý jazasy taǵaıyndaldy», - dep málim etti Qarmaqshy aýdandyq sotynan.

Eske salsaq, budan buryn Qyzylorda oblysynda qaryz alǵan tanysyn pyshaqtap óltirgen turǵyn sottaldy.