Qyzylorda oblysynda egiz balany satý oqıǵasyna qatysty úsh adam sottaldy

<p>QYZYLORDA. KAZINFORM - Qyzylorda oblysynda egiz balasyn satqan áıel men olardy zańsyz jolmen asyrap alýǵa áreket jasaǵan erli-zaıyptylarǵa qatysty sot úkimi shyqty.&nbsp;</p>

Aral qalasynda turatyn D. esimdi áıel bir azamatpen tanysyp, jaqyn qarym-qatynasta bolyp júredi. Saldarynan odan júkti bolyp, egiz náreste dúnıege alyp keletini anyqtalady. Alaıda ol ómirge alyp keletin nárestelerin satý arqyly paıda tabýdy kózdegen.

«Osy maqsatta ol tanystary erli-zaıypty J. jáne K.-men kezdesedi. Nátıjesinde bosanǵannan keıin balalaryn erli-zaıyptylarǵa aqshaǵa satý arqyly berý jóninde ózara kelisimge keledi. Erli-zaıyptylar oǵan banktiń qosymshasy arqyly dári-dármek jáne azyq-túlik alý úshin 2023 jyldyń qańtar-sáýir aılarynda ártúrli sommada barlyǵy 60 myń teńge aýdarǵan. Byltyr 21 sáýirde sottalýshy D. Qyzylorda qalasyndaǵy «Ana men bala ortalyǵynda» egiz balany dúnıege alyp ákelgen. Onyń perzenthanadan shyǵýyna baılanysty J. jáne K. oblys ortalyǵyna arnaıy keledi. Olardy Aral qalasyna deıin tasymaldap alyp barady. Sodan keıin óziniń egiz nárestesin erli-zaıyptylarǵa tabystap, kelisim boıynsha 200 myń teńgeni qolma-qol alǵan. Ony bas paıdasyna jumsap, ári qaraı kelisilgen qarajatty bólip tóleýge kelisedi. Erli-zaıyptylar oǵan banktiń mobıldik qosymshasy arqyly 252 myń jáne 34 myń teńgeni bólek-bólek aýdarǵan. Osylaısha, sottalýshy D. erli-zaıyptylardan egiz balalar úshin jalpy somasy 546 myń teńge alǵan», - dep málim etti Qyzylorda oblystyq kámeletke tolmaǵandardyń isteri jónindegi mamandandyrylǵan aýdanaralyq sotynan.

Sottalýshy jáne erli-zaıyptylar notarıýsqa júginip, sottalýshy egiz balalardy erli-zaıyptylardyń asyrap jáne qamqorlyqqa alýyna kelisim bergen. Osylaısha, sottalýshylar aldyn ala sóz baılasý arqyly materıaldyq táýeldilikti paıdalanyp, kámeletke tolmaǵan eki adamǵa qatysty satý áreketin jasaǵan.

«Bul qylmystyq is oblystyq kámeletke tolmaǵandardyń isteri jónindegi mamandandyrylǵan aýdanaralyq sotynda qaraldy. Sot úkimimen óziniń balalaryn satýǵa árekettengen D. QR Qylmystyq kodeksiniń 135-baby 2-bóligi 1),5),10),12)-tarmaqtarymen kináli dep tanylyp, oǵan 8 jyl merzimge bas bostandyǵynan aıyrý jazasy taǵaıyndaldy. Al erli-zaıypty sottalýshylar J. men K. QR Qylmystyq kodeksiniń 135-baby 2-bóligi 1),5),10),12)-tarmaqtarymen kináli dep tanyldy. Olarǵa Qylmystyq kodekstiń 55-baby 4-bóligi qoldanyp, 2 jyl merzimge bas bostandyǵynan aıyryldy», - dep tolyqtyrdy sottan.

Eske salsaq, budan buryn Qyzylorda oblysynda zańsyz mazýt satqan eki kásipker jazaǵa tartyldy.