Qyzylorda oblysynda bir aýylda ákim saılaýy ótip jatyr

<p>QYZYLORDA. KAZINFORM - Búgin Jańaqorǵan aýdanynyń Qyrash aýyldyq okrýgi ákiminiń saılaýy ótkizilip jatyr.</p>

Mańyzdy shara QR Saılaý týraly konstıtýtsııalyq zańyna sáıkes uıymdastyrylyp otyr. Jergilikti turǵyndar tańǵy saǵat 7.00-de №313 saılaý ýchaskesine keldi. Alǵashqy saılaýshyǵa syılyq berildi. Saıası naýqanda alǵash bolyp kelgen 81 jastaǵy qart saılaýshy Qalambaı Mampaev óz tańdaýyn jasap, bul kúnniń mańyzdylyǵyna toqtaldy. 

Foto: Oblystyq saılaý komıssııasy

«Aýyl ákimi saılaýyna erekshe mán beremiz. Prezıdent bastamasymen aýyl ákimderin tikeleı saılaý mańyzdy sheshim dep sanaımyn. Belsendi azamattyń qyzmetke kelgenin qalaımyz. Sol úshin óz tańdaýymdy jasap, daýys berýge asyqtym», - dedi Qalambaı Mampaev.

Aıtý ketý kerek, Qyrash aýyldyq okrýginde 475 saılaýshy daýys berýge quqyly. Ákim bolýǵa úmitti bolyp tirkelgen 3 kandıdattyń bári de ózin-ózi usynǵan.

Eske salsaq, jyl basynan beri Qyzylorda óńirinde 3 aýyldyń ákimi saılandy. Oblystyq aýmaqtyq saılaý komıssııasynyń tóraǵasy Ádilbek Ersultanovtyń aıtýynsha, bıyl óńirde 25 aýylda jergilikti turǵyndar jańa ákimin tańdaıdy. Al naýryz aıynda shyǵyp qalǵan máslıhat depýtattarynyń ornyna saılaý ótedi.

Qyzylorda oblysynda kent, aýyldyq okrýg ákimderiniń saılaýy joǵary deńgeıde júrgizilip jatyr. Aımaqta keıingi 3 jylda 117 aýyl ákimi saılanǵan. Ótken jyly 38 kent jáne aýyl ákiminiń saılaýy boldy.