Qyzylorda oblysynda bıyl balalardyń sýǵa ketýi alańdatyp otyr

<p>QYZYLORDA. KAZINFORM &mdash; Qyzylorda oblysynda bıyl sý aıdyndarynda ártúrli jaǵdaılar men oqys oqıǵalar saldarynan 21 adam kóz jumdy.</p>

Oblystyq tótenshe jaǵdaılar departamentiniń málimetine súıensek, byltyrǵy jylmen salystyrǵanda adamdardyń sýǵa ketý jaǵdaıy birshama tómendegen. Dese de ata-analar tarapynan baqylaýsyz qalýy saldarynan balalardyń sýǵa ketýi alańdatyp otyr.

«Ótken jyldyń segiz aıynda oblysta 29 adam sýǵa ketip qaza bolǵan edi. Onyń ishinde 8-i bala. Byltyrǵy jylmen salystyrǵanda jalpy adam qazasy 27% tómendep tur. Degenmen bıyl 11 balanyń sýǵa ketýi alańdatady. Adamdardyń sýǵa ketýine baılanysty Shıeli aýdany birinshi orynda tur. Onda bıyl alty adam sý aıdyndarynda qaza tapty. Jergilikti turǵyndardyń qaýipsizdik erejesin óreskel buzýy saldarynan osyndaı oqys jaǵdaıǵa dýshar bolady. Olar ózen nemese kanaldardyń kez-kelgen ári zerttelmegen jerine sýǵa túsedi. Oǵan qosa spırttik ishimdik iship sýǵa túsetinder kezdesedi. Sondaı-aq, balalardyń eresekterdiń baqylaýsyz sý jaǵasyna barýy men sýǵa túsýi jáne olardyń júze bilmegendigi qaıǵyly oqıǵalarǵa ákelip soqtyrýda», — dep málim etti Qyzylorda oblystyq tótenshe jaǵdaılar departamentinen.

Eske salsaq, budan buryn Qyzylordada oqýshy mektepte úzilis kezinde burysh ballonyn shashqan.