Qyzylorda oblysynda aýyl sharýashylyǵy jármeńkesi turaqty ótkiziledi
Oǵan qosa óńirde áleýmettik mańyzy bar azyq-túlik taýarlarynyń baǵasyn turaqtandyrý baǵytynda taýar ınterventsııasyn júrgizý men aınalym shemasy sheńberinde kásipkerlerge qaryz berý jolǵa qoıylǵan.
Oblystyq Aýyl sharýashylyǵy basqarmasynyń málimetine súıensek, búgingi kúni turaqtandyrý qorynda 1 346,4 tonna ónim qory bar. Atap aıtqanda, onda 29,9 tonna qaraqumyq jarmasy, 53,8 tonna kartop, 20 tonna pııaz, 43,0 tonna rojkı, 1,5 tonna kúnbaǵys maıy, 476,4 tonna un, 3,2 tonna taýyq eti, 511,3 tonna kúrish, 191,9 tonna qant, 15,6 tonna tuz jınaqtalǵan. Sondaı-aq oblysqa 1 359,8 myń dana taýyq jumyrtqasy jetkizildi.
«Bıyl maýsym-tamyz aılarynda turaqtandyrý qoryna 60 tonna kartop, 40 tonna pııaz, 10 tonna qyryqqabat satyp alynǵan. 2024 jylǵy kúzgi túsimniń kókónis ónimderin óndirý jáne 2025 jyldyń qysqy-kóktemgi kezeńinde halyqty kókónis ónimderimen qamtamasyz etý úshin qala halqynyń 3 aılyq qajettiliginiń 30% jýyq kóleminde, ıaǵnı 4 942 tonna kókónis alý úshin kelisimshart jasaldy. Al aınalym shemasy aıasynda 14 kásipkerlik sýbektilerdiń 4695,4 tonna ónimmen qamtamasyz etý jóninde mindetteme belgilendi», - dep málim etti oblystyq Aýyl sharýashylyǵy basqarmasynan.
Aımaqta áleýmettik nan baǵasyn retteý maqsatynda 2023 jyly «Azyq-túlik kelisimshart korporatsııasy» UK» AQ-nyń astyq resýrstarynan 3631,8 tonna astyq bólingen. Odan óndelgen 2579 tonna un oblysqa jetkizildi. Qazir odan 17,5 tonna un qory qalyp otyr.
«2023 jyly kommertsııalyq negizde «Qazaq uny» JShS-men jasalǵan kelisimshartqa sáıkes satyp alynǵan unnyń búginde 458,9 tonnasy qalǵan. Jalpy búginde 476,4 tonna un qory bar. Osy jyldyń qyrkúıek-jeltoqsan aılaryna «Azyq-túlik kelisim shart korporatsııasy» UK» AQ-nan sýbsıdııalanatyn 4 897,2 tonna astyq bólý jóninde QR Aýyl sharýashylyǵy mınıstrligine bıýdjettik ótinim joldandy. Jańa un kólemderi kelgenge deıin Túrkistan oblysynyń un óndirýshi kásiporynymen 350 tonna birinshi sortty unyn satyp alý jumystary júrgizildi», - dep tolyqtyrdy basqarmadan.
Aıta ketsek, turaqtandyrý qory boıynsha Aqtóbede úsh sharýanyń ónimine basymdyq berildi. Eske salsaq, Pavlodar oblysy keıbir azyq-túliktiń arzandyǵy boıynsha elimizdegi bestikke kiredi.