Qyzylorda oblysynda alımentten jaltarǵan 154 boryshker qumar oıynǵa 250 mln teńge salǵan
Qyzylorda oblysynda alıment bereshegi 380 mln teńgege deıin tómendedi. Osylaısha elimizdegi bereshegi eń az aımaqtyń aldyńǵy qataryna engizildi.
«Oblys prokýratýrasy qumar oıyndarǵa 250 mln teńgeden astam qarajat jumsaǵan 154 boryshkerdi anyqtady. Boryshkerler alıment tóleý jónindegi mindettemelerin elemeı, nemquraılylyq tanytqan. Býkmekerlik keńselerde qumar oıyndar oınaǵan. Máselen, alıment boıynsha 1 mıllıon teńge qaryzy qalyptasqan turǵyn óziniń shotyn 156 mıllıon teńgeden astam somaǵa tolyqtyrǵan. Prokýratýra bastamasymen alıment tóleýden jaltaryp júrgen 18 boryshkerge qatysty QR Qylmystyq kodekstiń 139-babymen qylmystyq is tirkelip, onyń 12-i jaýaptylyqqa tartyldy. Al 9 boryshker sot úkimimen bas bostandyǵyn shekteý jazasyna sottalsa, 3 is boıynsha boıynsha tergeý jalǵasýda», - dep málim etti oblys prokýratýradan.
Vedomstvo málimetinshe, Qyzylorda oblysynyń prokýratýrasy bıylǵy jyldyń 6 aıynda alıment óndirý baǵytynda Ádilet departamentine jáne Jeke sot oryndaýshylarynyń óńirlik palatasyna 12 zańdylyqtyń buzylýyn joıý týraly usyný engizdi. Nátıjesimen 155 jalǵyz basty ananyń paıdasyna 91 mln teńge alıment bereshegi óndirildi.
Eske salsaq, budan buryn Qyzylordada pıramıda quryp, 26 mln teńgeni qaltasyna basqan áıel sottaldy.