Qyzylorda oblysynda 30 kent jáne aýyldyq okrýgterde ákim saılaýy ótedi

<p>QYZYLORDA. KAZINFORM - Qyzylorda oblysynda jyl basynan beri 1 kent jáne 10 aýyldyq okrýg ákiminiń saılaýy ótkizildi.</p>

Oblystyq saılaý komıssııasynyń habarlaýynsha, bıyl aımaqta 25 kent jáne aýyldyq okrýg ákimderiniń ókilettilik merzimi aıaqtalady. Sondaı-aq turǵyndar ókilettiligi merziminen erte aıaqtalǵan 5 aýyl ákimin saılaıdy.

«Aldaǵy jeksenbide, 7 shildede Shıeli aýdanyndaǵy Aqmaıa jáne Turan aýyldyq okrýginde saılaý uıymdastyrylady. Bul aýyldyq okrýgter boıynsha 3417 saılaýshy daýys berýge quqyly. Onda 2 ýchaske qurylyp, 14 komıssııa múshesi qyzmet atqarady. Al, 14 shilde kúni Qazaly aýdanynyń Áıteke bı kenti men Jańaqorǵan aýdanynyń Sýnaqata aýyldyq okrýginiń turǵyndary jańa ákimdi saılaýǵa atsalysady. Kent jáne aýyldyq okrýg boıynsha 30 myńǵa jýyq saılaýshy tirkelgen. Saılaý ýchaskelerindegi daýys berý kabınasy talapqa saı jabdyqtaldy. Múgedektigi bar azamattar úshin de qolaıly jaǵdaı jasalǵan»,- dep atap ótti oblystyq saılaý komıssııasynan.

Aıta ketsek, Qyzylorda oblysy boıynsha barlyǵy 146 kent jáne aýyldyq okrýg ákimi bar. Olardyń 143-i er, 3-i áıel azamatsha.