Qyzylorda oblysynda 2 aýdanda ákim saılaýyna daıyndyq bastaldy

<p>Bıyl ákim saılaýy Qyzylorda oblysynda Shıeli jáne Syrdarııa aýdandarynda ótedi. Qazir osy baǵytta tıisti daıyndyq jumystary júrgizilip jatyr, dep habarlaıdy QazAqparat tilshisi.</p>

Pılottyq negizde Qyzylorda oblysynyń Shıeli jáne Syrdarııa aýdandarynda ákim saılaýyn ótkizý josparlanyp otyr.

«Búginde Syrdarııada 18, Shıelide 40 ýchaskelik komıssııa jumys isteıdi. Onda 388 komıssııa múshesi qyzmet atqarady. Saılaýshylarmen belsendi jumys júrgizilýde. Bıylǵy jyldyń 1 shildesindegi jaǵdaı boıynsha Syrdarııa aýdanynda - 22644, Shıeli aýdanynda -50697 saılaýshy tirkelgen. Búginde saılaýdy taǵaıyndaý jáne okrýg qurý týraly qaýly shyǵyp, kúntizbelik jospar belgilengen. Aýmaqtyq saılaý komıssııalary 16 qyrkúıekten bastap kandıdattardan qujat qabyldaý jumystaryn júrgizýde. Al 5 qazan saǵat 18.00-den keıin kandıdattardan usynym qabyldaý aıaqtalady. Odan keıin tirkeý jumystary júrgiziledi»,- dep málim etti Qyzylorda oblystyq saılaý komıssısynan.

Komıssııa mamandarynyń aıtýynsha, kandıdattar partııa atynan jáne ózin-ózi usynýǵa múmkindigi bar. Degenmen úmitkerlerdiń óz saılaý qory bolmaıdy. Saılaýshylarmen úgit kezeńinde árbir kandıdatqa 420 myń teńge belgilendi. Ol buqaralyq aqparat quraldaryna shyǵýǵa, úgit materıaldaryn jasaýǵa jáne kólik shyǵyndaryn paıdalanýǵa baǵyttalǵan.

«10 qazan kúni jergilikti ýaqytpen saǵat 18.00-den bastap úgit kezeńi bastalady. Kandıdattar saılaýshylarmen kezdesip, óz saılaýaldy baǵdarlamasyn belgilengen shyǵys mólsheri aıasynda BAQ arqyly nasıhattaıdy. Saılaý protsesin baıqaýshylar baqylaı alady. Jyl basynan beri Qyzylorda óńirinde 26 qoǵamdyq birlestik pen kommertsııalyq emes uıym tirkeldi», - dep tolyqtyrdy komıssııadan.