Qyzylorda oblysynda 10-synyp oqýshysyn uryp óltirgen jasóspirim sottaldy

<p>QYZYLORDA. KAZINFORM - Qyzylorda oblysynda jasóspirimniń ólimine sebepshi bolǵan onynshy synyp oqýshysyna qatysty sot úkimi shyqty.</p>

Oqıǵa Shıeli aýdanyna qarasty Sh.Qodamanov aýylynda bolǵan. Sol aýylda turatyn 10-synyp oqýshylary áńgime arasynda 9-synyp oqýshylary ózderimen amandaspaı, syılamaýshylyq tanytyp júrgenin alǵa tartady. Sodan keıin olardy tártipke keltirý úshin aýyl shetine jınalǵan.

«Sottalýshy Q. toǵyzynshy synyp oqýshylaryn uryp kele jatyp, jábirlenýshi A.-nyń kókirek tusynan judyryǵymen bir márte qatty soqqy jasaǵan. Bul soqqy jábirlenýshiniń júreginiń reflektorly toqtaýyna alyp kelgen. Atalǵan jasóspirim aýyr dene jaraqatynan oqıǵa ornynda qaıtys bolǵan. Bul qylmystyq is Qyzylorda oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynda qaraldy. Sot úkimimen kámeletke tolmaǵan sottalýshy Q. QR Qylmystyq kodeksiniń 106-babynyń 3-bóliginde kózdelgen qylmystyq quqyq buzýshylyq jasaǵany úshin kináli dep tanylyp, oǵan 6 jyl 8 aı bas bostandyǵynan aıyrý jazasy taǵaıyndaldy», - dep málim etti Qyzylorda oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynan.

Eske salsaq, budan buryn Qyzylorda oblysynda 8 adamdy bopsalaǵan blogerdiń bas bostandyǵy shekteldi.