Qyzylorda oblysy qurylys jumystary kórsetkishinen aldyńǵy qatarda keledi

<p>QYZYLORDA. KAZINFORM &mdash; Qyzylorda oblysynda bıylǵy 9 aıda qurylys jumystary kóleminiń kórsetkishi 173 mlrd 830 mln teńgege jetti. Ol ótken jyldyń osy kezeńimen salystyrǵanda 143,6 paıyzǵa ósti. Sońǵy 2 jylda Qyzylorda oblysy atalǵan kórsetkishte elimizde aldyńǵy qatarda keledi.</p>

Bul týraly oblys ákimi Nurlybek Nálibaev Ortalyq kommýnıkatsııalar qyzmetiniń Qyzylordadaǵy brıfınginde atap ótti.

«Turǵyn úı-kommýnaldyq ınfraqurylymdy damytýdyń 2023-2029 jyldarǵa arnalǵan tujyrymdamasy aıasynda memleket qoldaýymen qarjylandyrýdyń barlyq kózinen 864 myń sharshy metr turǵyn úıdi paıdalanýǵa berýdi josparlap otyrmyz. Bıyl bıýdjetten turǵyn úı qurylysyna jáne jeke salýshylardan daıyn páterler satyp alýǵa 39,1 mlrd teńge qaraldy. Jyl qorytyndysymen 2,5 myńnan astam páter paıdalanýǵa beriledi. Qazir Ulttyq joba aıasynda 1 myń 154 páterlik 21 turǵyn úıdiń qurylysy júrgizilýde. Áleýmettik jaǵynan osal toptar úshin 1 myń 819 páter, apatty úıler ornyna 135 páter satyp alý josparlanǵan. Búginde atalǵan toptarǵa 780 páter satyp alyndy. Sońǵy eki jylda 4 myńǵa jýyq páter tabystalyp, 17 myń turǵynnyń baspana máselesi sheshildi», — dedi N.Nálibaev.

Turǵyn úı qurylysynyń kólemi 126 paıyzǵa ósti. Ol 2022 jyly 683 myń sharshy metr bolsa, 2023 jyly 741 myń sharshy metrge jetti. Bıyl jyl sońyna deıin 864 myń sharshy metrge ulǵaıtý josparlanǵan.

Qurylys salasynda bıyl 189 jobany júzege asyrýǵa 134,8 mlrd teńge bólindi. Onyń ishinde 36 bilim berý, 22 densaýlyq saqtaý, 13 mádenıet, 14 sport, 1 qoǵamdyq tártip, 1 jumyldyrý daıyndyǵy, 3 memlekettik organ ǵımaraty, 1 154 páterlik 21 turǵyn úı qurylysy, ınjenerlik-kommýnıkatsııalyq ınfraqurylym tartý boıynsha 85 joba bar.

Jyl basynan beri Qyzylorda qalasynda «Óner ortalyǵy», «Qan ortalyǵy», «Ústel tennıs ortalyǵy», «Oqýshylar saraıy» jáne sol jaǵalaýdaǵy 900 oryndyq jaıly mektep paıdalanýǵa berildi. 

Jańa stadıon, «Innovatsııalyq- shyǵarmashylyq ortalyq», mýzykalyq kolledj ǵımaraty qurylysy bastaldy. Endigi kezekte barlyq aýdanda tıptik úlgidegi «Rýhanııat ortalyqtary» salynýda. Bul oryn mýzeı, kitaphana, arhıv, neke qııý zaly, ardagerler jáne analar, jastar ortalyqtary, azamattyq qoǵam ókilderi men tarıhı-mádenı, rýhanı uıymdardy biriktiredi.

Sondaı-aq 9 dárigerlik ambýlatorııa jáne 2 feldsherlik-akýsherlik pýnkt, Jańaqorǵan aýdanynyń Tómenaryq aýylynda, Aral aýdanynyń Sekseýil kentinde aýrýhana, Jańaqorǵan kentinde «Oqýshylar úıi» jáne 3 jaıly mektep paıdalanýǵa beriledi. Bıyl demeýshiler esebinen 17 nysannyń joba-smetalyq qujattamasy ázirlendi.