Qyzylorda áýejaıynyń jańa termınaly qalaı jumys isteıdi - fotoreportaj
Joba boıynsha termınal alańy – 7 500 sharshy metr. Qurylys jumystary 2023 jyldyń aqpanynda bastalyp, 2024 jyldyń sáýir aıynda aıaqtaldy. Qazirgi ýaqytta áýejaı aýmaǵy abattandyrylyp, uzyndyǵy 480 metr 4 jolaqty avtokólik joly salynýda.
«Bul ǵımarat jeke ınvestor esebinen shamamen 17 mlrd teńgege salyndy jáne áýe qyzmetterin halyqaralyq deńgeıge jetkizýge múmkindik beredi. Al áýejaıdyń ınfraqurylymy úshin jergilikti bıýdjetten 4,3 mlrd teńge bólinip, sý, káriz, elektr jáne baılanys-ınternet jelilerin tartý, bý qazandyǵyn salý jumystary júrgizildi. Barlyq reıster jańa termınalǵa kóshiriledi jáne eski termınaldy basqa sharýashylyq maqsattarda paıdalanýdy jalǵastyramyz», - dedi «Qorqyt ata» áýejaıy AQ basqarma tóraǵasy Baıan Ájmoldaev agenttikke bergen suhbatynda.
Jańa termınalda ishki jáne halyqaralyq reısterge arnalǵan zaldar, tranzıttik jolaýshylar zaly, SІR-zal, júkti avtomatty túrde berý júıesi, «Duty Free» aımaǵy, saýda núkteleri, medıtsınalyq bólim, jolaýshylardy tirkeýke arnalǵan 8 oryn jáne 5 ózin-ózi tirkeý beketi, 10 tólqujat tekserý kabınasy bolady.
Qurylysqa mármar, granıt, traventın, akvapanel syndy joǵary sapaly materıaldar qoldanylǵan. Lıft pen eskalator – Fınlıandııadan, bagaj júıesi – Frantsııadan, teletrap – Ispanııadan jetkizilgen.
Sondaı-aq, jańa termınalda áýe kemelerine qyzmet kórsetetin arnaıy tehnıkalar – janar-jaǵarmaı quıýshylar, ushaqtardy súıemeldeıtin avtokólik, ózi júretin lentaly transporter, agregat generator bar.
Qazirgi áýejaı saǵatyna 150 jolaýshy qabyldasa, jańa termınal iske qosylǵan soń, áleýeti 250 jolaýshyǵa deıin ulǵaıady. Nátıjesinde kólik tasymaly kórsetkishteri 1,5 esege artady. Oǵan qosa, 40 jańa jumys orny qurylmaq.
Aıta keteıik, Qyzylordada 1986 jyldan beri V dárejeli halyqaralyq Qorqyt Ata» áýejaıy jumys isteıdi. Búgingi kúni áýejaıda aptasyna 30 turaqty reıs oryndalýda, onyń ishinde: Astanaǵa – 14, Almatyǵa – 15, Antalııaǵa (Túrkııa) – 1 reıs bar. Taǵy qosymsha halyqaralyq reıster ashý úshin kelissózder júrgizilýde.