«Qyzyl kitapqa» engen qustardy zańsyz aýlaǵan túrkistandyq azamat ustaldy

<p>Túrkistan oblysynyń polıtseıleri Qyzyl kitapqa engen qustardy zańsyz aýlaý jáne tasymaldaý faktisiniń jolyn kesti. Bul týraly Іshki ister mınıstrligi baspasóz qyzmetiniń ókili Shuǵyla Turlybek málim etti, dep habarlaıdy Kazinform.</p>

«Ordabasy aýdandyq polıtsııa bóliminiń qyzmetkerleri «Brakoner» jedel-aldyn alý is-sharasy barysynda «Ohotzooprom» ınspektorlarymen birlesip, Shymkent-Samara tas jolynda Audi 100 avtokóliginiń júrgizýshisin toqtatty. Kóliktiń júksalǵyshyn teksergen kezde polıtseıler eki jaralanǵan ıtelgi men jeti qarabaýyr buldyryq qustaryn tapty», - dedi ol ІІM baspasóz qyzmeti alańynda ótken brıfıngte.

Onyń atap ótýinshe, oqıǵanyń mán-jaıyn anyqtaý úshin Shymkent qalasynyń turǵyny polıtsııa bólimine jetkizildi.

«Qazirgi ýaqytta oǵan qatysty QR QK «Ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý» 339-babynyń 1-bóligi boıynsha sotqa deıingi tergep-tekserý júrgizilýde. Jabaıy qustar Shymkentte ornalasqan memlekettik haıýanattar baǵyna berildi», - dedi Shuǵyla Turlybek.