«Qıyrdaǵy qazaqtar»: Mońǵolııadaǵy qandastar týraly fılmniń tusaýkeseri ótti

ASTANA. QazAqparat - Astanada Mońǵolııa qazaqtarynyń tarıhy men búginin baıandaıtyn «Qıyrdaǵy qazaqtar» derekti fılminiń tusaýkeseri ótti, dep habarlaıdy «QazAqparat» HAA tilshisi.

Atalǵan jobany 2017 jyldyń maýsym aıynan bastap «National digital history» ınternet-portalynyń basshysy Oljas Berkinbaevtyń jetekshilik etýimen QR Aqparat jáne kommýnıkatsııalar mınıstrligi júzege asyrdy. Derekti fılm ulttyq sana men tól tarıhty jańǵyrtý, alys-jaqyn shetelderde turyp jatqan qazaqtardyń shynaıy ómirin kórsetý maqsatynda túsirilgen. Fılmniń demeýshisi - Oralbek Botbaı.
 

Túsirilim toby óte aýqymdy jumystardy atqarǵan. Reseıdiń Astrahan, Mońǵolııanyń Ulanbatyr qalasyn, Ózbekstan astanasy Tashkenttegi Kenımeh aýdanyna deıingi jáne Tájikstannyń Hýdjand qalasyna deıingi jerdi, bas aıaǵy on myńdaǵan shaqyrym joldy basyp ótken. Ǵajaıyp tarıhı oryndardy kózimen kórip, erekshe taǵdyr ıelerin taspaǵa túsirgen.
   

Astanada tusaýkeseri ótken «Qıyrdaǵy qazaqtar» derekti fılmder toptamasynyń Mońǵolııa qazaqtaryna arnalǵan bólimi kóptiń kóńilinen shyqty. Týyndyda Ulanbatyr qalasy men oǵan jaqyn ornalasqan Nalaıhan aýdanynda ǵumyr keship jatqan etnıkalyq qazaqtardyń búgingi tirshiligi kórsetiledi.
  

«Bul - Elbasynyń «Rýhanı jańǵyrý» baǵdarlamalyq maqalasyn júzege asyrý maqsatynda qolǵa alynǵan joba. Eń bastysy, bul jobany tek qana bastama dep esepteımiz. Shetelde 5 mıllıonǵa jýyq qazaqtyń turyp jatqany bizge belgili. Sondyqtan, olarǵa biz erekshe nazarmen qaraımyz. Ekinshi jaǵynan Elbasy aıtqandaı, olarǵa Qazaqstannyń árqashan esigi ashyq. 25 jyldyń ishinde 1 mıllıonǵa jýyq qandastarymyz elge keldi. Derekti fılmdi demeýshilik etken Oralbek Botbaı myrzaǵa, «Qazkontent» basqarmasynyń tóraǵasy Evgenıı Kochetov myrzaǵa zor alǵysymdy aıtqym keledi. Qany qazaq bolmasa da, zaty qazaq (Kochetov týraly - avt.). Osyndaı jobany ózi (Evgenıı Kochetov - avt.) ózi usyndy», - dedi fılmniń tusaýkeserinde QR Aqparat jáne kommýnıkatsııalar mınıstri Dáýren Abaev.
   

Mańyzdy is-shara qandastardyń tarıhı otanynan beıimdelý máselerine taǵy bir nazar aýdarýǵa jáne tarıhı otanynan tys ómir súrip jatqan etnıkalyq qazaqtardyń máselelerin kóterýge jol ashady.

Derekti fılm jýyq arada «National digital history» portalynda jarııalanady.