Qıyndyqtar boldy, soǵan qaramastan naýqastarǵa medıtsınalyq kómek kórsetildi - Alekseı Tsoı

NUR-SULTAN. QazAqparat – QR Densaýlyq saqtaý mınıstri Alekseı Tsoı koronavırýstan qaıtys bolǵandardyń kórsetkishi Qazaqstanda ózge eldermen salystyrǵanda nelikten az ekendigin túsindirdi, dep habarlaıdy QazAqparat.

«Habar24» telearnasynda ótken dóńgelek ústel otyrysy barysynda júrgizýshi Rahym Oshaqbaev sarapshylardyń málimetterine súıene otyryp, Qazaqstanda ózge eldermen salystyrǵanda, koronavırýs indetinen qaıtys bolǵandar sanynyń az ekenin aıtty.

«Dúnıejúzilik densaýlyq saqtaý uıymynyń málimetterine qaraıtyn bolsaq, Ulybrıtanııada 1 mln adamǵa shaqqanda kisi ólimi 665 adamnan, Ispanııada 608 adamnan, Qazaqstanda 31 adamnan keledi»,-dedi júrgizýshi.

«Bul jerde jaǵdaıǵa yqpal etip otyrǵan birneshe faktor bar. Solardyń biri medıtsınalyq kómektiń qoljetimdiligi. Árıne, bizdiń jumysymyzda, statsıonarlardyń naýqastarǵa tolyp ketýi sııaqty birshama qıyndyqtar boldy. Soǵan qaramastan shet memleketterde adamdar aýrýhana dálizderi men edende jatqanda bizdiń azamattarymyz qajetti medıtsınalyq kómekti aldy»,-dep jaýap berdi Alekseı Tsoı.

Onyń sózinshe, adamdardyń indetten qaıtys bolý jaǵdaılary kóbine pnevmonııamen baılanysty bolyp otyr. Basqadaı kórsetkishter durys.

«Bizde ósim tap osy pnevmonııamen baılanysty aýrýlar boıynsha boldy. Ekinshi jaǵynan jol apattarynan bolatyn adam ólimi azaıdy. Jalpy alǵanda biz adamdardyń qaıtys bolý jaǵdaılary pnevmonııamen baılanysty bolǵandyǵyn anyq baıqadyq»,-dedi mınıstr.

«Biz alǵash ret jarııalaǵan karantın der kezinde qolǵa alynǵan shara boldy. Sonyń arqasynda indettiń geometrııalyq progrespen órshýiniń aldyn ala aldyq. Karantın indettiń taraýyna aıtarlyqtaı kedergi boldy. Adamdar vırýs juqtyryp jatqanymen olarǵa medıtsınalyq kómek kórsetilip, indet taraý kórsetkishi tómendedi»,-dedi mınıstr.

Onyń sózinshe, Qazaqstanda koronavırýstan adamdardyń qaıtys bolý jaǵdaılary krantın toqtap, indet kúrt órship, densaýlyq saqtaý salasy aýrýhanalarda oryn men jasandy tynys alý apparattarynyń jetispeýshiligi sııaqty qıyndyqtardy bastan ótkerip jatqanda boldy. «Al oǵan deıin eldegi medıtsınalyq mekemelerdiń barlyǵy ózderine júktelgen mindetti talapqa saı atqardy. Jedel járdem kórsetilip, jasandy tynys alý apparattary da jetkilikti boldy. Azamattar medıtsınalyq kómekti alyp, qajetti sharalar atqaryldy»,-dedi mınıstr.