Qıyn sátte qoldaǵany úshin Qazaqstan halqyna alǵys aıtamyn – Debora Laıons
«Birikken ulttar uıymy Qazaqstannyń áriptestik kórsetip, Almatyda ýaqytsha keńse ornatqany úshin alǵys aıtady. Bul keńseni ornalastyrý Kabýldaǵy bılik qulaǵanǵa deıin kelisilgen bolatyn. Osy kelissózder kezinde Kabýldaǵy jaǵdaı nasharlaǵan jaǵdaıda personal sanyn ýaqytsha qysqartyp, Aýǵanstandaǵy áreketter kúsheıse, BUU personalyn osy elge jaqyn ári qaýipsiz jer retinde jetkizý kerek degen sheshim qabyldanǵan», - deıdi Birikken Ulttar Uıymynyń Aýǵanstanǵa kómek kórsetý jónindegi mıssııasynyń arnaıy ókili .
Sondaı-aq, ol qazir Aýǵanstannan ketkisi keletin adamdardyń arasynda haos bolyp jatqanyn atap ótti.
«Qazir Aýǵanstannan shyqqysy keletin adamdardyń arasynda haos bolyp jatqanyn kórip otyrmyz. Birikken ulttar uıymynyń UNAMA agenttigi talıban kósemderimen baılanys ornatý úshin jumys istep jatyr. Bul Aýǵanstandaǵy adamdarǵa tirshilik úshin mańyzdy qyzmetter usyný úshin qajet. Birqatar Aýǵanstan kóshbasshysy áli de álemniń ár elinde júr. Múmkindik barda bizdiń halyqaralyq personal Almaty men Kabýl arasynda jumys isteı beredi», - degen UNAMA basshysy Qazaqstan Úkimeti men halqyna uıym atynan rızashylyǵyn bildirdi.
«Qazir UNAMA ókilderiniń Aýǵanstanǵa baryp, alańsyz jumys isteýi boıynsha kelissózderde qaralyp jatyr. Almatydaǵy qurylyp jatqan keńse tek halyqaralyq personalǵa arnalady. Qalǵan mamandar ýaqytsha negizde ózge elderge jiberiledi. Qazaqstan Úkimeti men Qazaqstan halqyna BUU jumysyna qosqan úlesi úshin, elderińizde baza qurýǵa ruqsat berip, osynaý qıyn kezeńde qoldaý kórsetkendirińiz úshin erekshe rahmet aıtamyz», - dedi Debora Laıons.