Qytaımen vızasyz rejım Qazaqstan týrızmine qalaı áser etedi – sarapshy pikiri

<p>Erteń 10 qarashada Qazaqstan men Qytaı arasyndaǵy vızasyz rejım kúshine enedi. Bul rejım eki el arasyndaǵy týrıstik aǵymdardy da arttyratyny sózsiz. Osy oraıda Kazakh Toursim ulttyq kompanııasynyń basqarýshy dırektory Danıel Serjanuly vızalardyń alynýy Qazaqstan týrızmine qalaı áser etetini jóninde pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.</p>

«Qytaı – Qazaqstan úshin eń basym týrıstik naryqtardyń biri. Sebebi bul bizge kórshiles memleket, eki el arasynda birshama áýe reısteri bar. Naqty tsıfrlarmen aıtar bolsaq, 2019 jyly bizde Qytaıdan kelgen 90 myńǵa jýyq týrıst tirkelgen. Al bıylǵy 10 aıdyń ishinde 85 myńǵa jýyq týrıst keldi, ıaǵnı jyl aıaǵyna deıin pandemııaǵa deıingi kórsetkishten de asyp túsemiz degen boljam bar», - dedi D. Serjanuly agenttik tilshisine bergen suhbatynda.

Qazaqstan men Qytaı qalalary arasynda 6 baǵyt boıynsha bes áýe kompanııasy aptasyna 20 shaqty reıs jasaıdy. Kóbinese bul reıster Beıjiń qalasynan Astana men Almatyǵa, oǵan qosa, Úrimji, Sıan qalasynan ushady. Bul baǵyttar ári qaraı keńeıe túsedi degen boljam bar.

Ótken jylmen salystyrǵanda Qytaıdan Qazaqstanǵa kelgen týrıster sany eki esege artqan. 2022 jyly Qazaqstannyń qonaq úılerinde shamamen 45 myń qytaılyq týrıst toqtaǵan. Olardan túsken paıdanyń jalpy kólemi 16 mln dollarǵa jýyqtaıdy. Bul 2021 jylmen salystyrǵanda eki ese artyq.

«Bıyl da týrıster sany artatynyn eskersek, paıda da eselep kóbeıedi degen sóz. Kazakh Toursim kompanııasy usynǵan «e-qonaq» júıesi sheteldik týrıster aǵynyn eseptep otyrady. Sol boıynsha búgingi kúnge deıin mıllıonnan astam týrıster sanyn baıqadyq, sonyń ishinde TOP-3 qatarynda Qytaı naryǵy da bar. Kóp jaǵdaıda qytaılyq týrıster Almaty qalasy men Almaty mańyndaǵy týrıstik oryndarǵa keledi. Almaty – tek qana Qytaı naryǵynda emes, jalpy sheteldik týrıster arasyndaǵy kóshbasshy baǵyt. Qytaı týrısteri tek qana qalalarǵa emes, tabıǵı oryndar men ulttyq parkterge jıi barady. Ásirese Іle Alataýy, Sharyn, Shymbulaq sekildi oryndardy jıi tańdaıdy», - deıdi kompanııa ókili.

Onyń aıtýynsha, Kazakh Toursim kompanııasynyń sheteldik týrısterdi tartýdaǵy negizgi róli – marketıng, ıaǵnı jarnama jasaý.

«Bizge Qytaı naryǵy bıyldan bastap qaıta ashyldy, budan basqa Qazaqstan – qytaılyq týrıster úshin toppen saıahattaýǵa ruqsat etilgen 20 baǵyttyń arasyna kirdi. Osynyń arqasynda biz kóptegen jarnama júrgizdik, eń mańyzdysy – Qytaıdaǵy eń úlken onlaın týrıstik agenttik platformasynda jarnama naýqanyn júrgizdik, qytaılyq blogerlerdi tartyp, jalpy 50 mln adam aýdıtorııany qamtydyq. Kelesi jyl – «Qytaıdaǵy Qazaqstan týrızmi jyly» dep atalǵan. Osynyń aıasynda naýryz aıynan bastap jyldyń ashylýyn ótkizip, úlken kórmeler uıymdastyramyz. Qazaqstandyq týrıstik kompanııalardy, týrızmde jumys isteıtin ókilderdi Qytaıda ótetin úlken týrıstik sharalarǵa aparamyz, jergilikti týrıstik bıznespen tanystyrý úshin kezdesýler ótkizýdi josparlap otyrmyz. Budan bólek, qytaılyq úlken týrıstik kompanııalardy, mıllıondaǵan aýdıtorııasy bar qytaılyq blogerlerdi, medıa resýrstaryn elge shaqyryp, týrıstik áleýetimizdi kórsetý josparlanǵan. Basqa da memlekettik organdarmen birge, qytaılyq týrısterge jaǵdaı jasaý, solardyń tilderinde aqparat daıyndaý, olardyń tilderinde túrli nusqaýlyqtar ázirleý jumystary júrip jatyr», - dedi Danıel Serjanuly.