Qytaılyqtardyń dastarhanynda qazaqstandyq ónim kóbeıip keledi – Sı Tszınpın
Maqalada Sı Tszınpın Qazaqstan aýmaǵynda qytaı ınvestıtsııasyna iske asyp jatqan jobalardyń birnesheýine toqtalyp, «Batys Qytaı — Batys Eýropa» dáliziniń irkilissiz jumys istep turǵanyna nazar aýdarady.
«Biz iskerlik yntymaqtastyqta ózara paıda men birlesip damý rýhynda jańa tańǵalarlyq nátıjelerge qol jetkizdik. Ekijaqty saýda-sattyqtyń byltyrǵy kólemi rekordtyq deńgeıdegi 41 mlrd AQSh dollaryna jetti. Qytaı Qazaqstannyń negizgi saýda seriktesi bolyp otyr jáne qazaqstandyq taýarlardyń iri ımporttaýshysy. Jańatas JES-i, Turǵysyn GES-i, sııaqty strategııalyq turǵydan mańyzdy jobalar tabysty iske qosyldy. Shymkent munaı óńdeý zaýytynda jańǵyrtý jumystary men kúrdeli jóndeý aıaqtaldy. Qytaı-Qazaqstan munaı-gaz qubyrlary qaýipsiz ári turaqty negizde jumys istep tur, aýylsharýashylyǵy ónimderiniń barlyq túrin jetkizýge baılanysty kedendik rásimderdi jedeldetetin jasyl dáliz quryldy, qytaılyqtardyń dastarhanynda Qazaqstannyń sapasy joǵary, ekologııalyq turǵydan taza aýylsharýashylyǵy ónimderi barǵan saıyn kóbeıip keledi», — dedi Qytaı basshysy.
QHR tóraǵasynyń paıymdaýynsha, ekijaqty qarym-qatynasta jańartylatyn qýat kózderi men kólik ınfraqurylymy salasynyń áleýeti zor.
«Sıan qalasynda qurǵaq port qatarǵa qosyldy. Batys Eýropa — Batys Qytaı avtojoly, Qytaı-Eýropa baǵytyndaǵy konteınerli poıyz irkilissiz jumys istep tur. Bul da eki eldiń damýyna qýatty serpin beredi», — dedi Sı Tszınpın.
Buǵan deıin habarlanǵanyndaı, 2-4 shilde kúnderi Prezıdent Qasym-Jomart Toqaevtyń shaqyrýymen Qytaı Halyq Respýblıkasynyń Tóraǵasy Sı Tszınpın Qazaqstanǵa memlekettik saparmen keledi. Ol sondaı-aq, Shanhaı yntymaqtastyq uıymyna múshe memleketter basshylary keńesiniń 24-shi otyrysyna qatysady.