Qytaılyq ınvestorlar Qazaqstanda dándi daqyldardy tereń óńdeý jobalaryn júzege asyrmaq

<p>ASTANA. KAZINFORM - Qytaılyq ınvestorlar Qazaqstanda tıamýlın men taǵamdyq qospalar óndirisine qyzyǵýshylyq tanytty. Ol úshin respýblıkada dándi daqyldardy, onyń ishinde júgerini tereń óńdeý boıynsha kásiporyndar salynady. Bul týraly &laquo;Kazakh Invest&raquo; kompanııasynyń basshylyǵy habarlady, dep jazady QR Úkimetiniń baspasóz qyzmeti.</p>

«Qytaılyq kompanııalardyń biri bizde tıamýlın óndirý úshin júgerini tereń óńdeý zaýytyn salýǵa daıyn. Bul mal sharýashylyǵynda qoldanylatyn tanymal dári. Keıinnen ónimdi álemdik naryqtarǵa, onyń ishinde Qytaıǵa eksporttaý josparlanýda. Sondaı-aq biz astyqty tereń óńdeýmen aınalysatyn kompanııamen kelistik. Onyń basshylyǵy Aqmola oblysynda túrli taǵamdyq qospalar shyǵaratyn kásiporyn salýdy josparlap otyr. Investıtsııa somasyn qytaı tarapy $650 mln kóleminde qamtamasyz etedi», — dep atap ótti «Kazakh Invest» UK» AQ basqarma tóraǵasy Erjan Elekeev.

Aıta keteıik, QR Premer-mınıstri Oljas Bektenov Qytaı Halyq Respýblıkasyna jumys sapary aıasynda bıznes ókilderiniń qatysýymen ótken Qazaqstan-Qytaı ınvestıtsııalyq dóńgelek ústeline qatysty.

Onyń aıasynda qytaılyq kompanııalarmen quny 2,5 mlrd dollar bolatyn kelisim jasaldy.