Qytaılyq BAQ Qasym-Jomart Toqaevtyń Beıjińge sapary týraly ne jazdy
«Qytaıdy jaqsy biletin Prezıdent» – QHR ChinaNews aqparat agenttigi
Qazaqstan Prezıdenti Qytaıǵa eki kúndik resmı saparmen bardy jáne Qytaıda ótken joǵary deńgeıdegi «Bir beldeý, bir jol» ІІІforýmyna qatysty.
Qytaıdyń memlekettik aqparat quraldarynyń biri sanalatyn ChinaNews tilshisi QR Prezıdentiniń sapary týraly tikeleı efırdegi reportajy barysynda Qasym-Jomart Toqaevty «Qytaı halqynyń jaqsy dosy» jáne «Qytaıdy jaqsy biletin sheteldik Prezıdent» dep atady.
Atalǵan BAQ Q. Toqaevtyń Qytaıda bilim alǵany, turyp kelgeni týraly aıta kele, qytaıdyń kóptegen dámdi taǵamy Qazaqstan Prezıdentine zor áser qaldyrǵanyn da eske aldy.
«Bul – Prezıdent Toqaevtyń Qytaıǵa bıylǵy ekinshi ret kelýi. Qazaqstan basshysynyń Qytaıǵa altyn kúzdegi osy saparynan eki jaqty qarym-qatynastyń damýy jańa kezeńge aıaq basýyn jáne «Bir beldeý, bir jol» bastamasyn qurýdaǵy birlesken kúsh-jigerine jańa serpin berýin kútemiz», – dep atap ótti ChinaNews tilshisi.
Sı Tszınpınniń Qazaqstan Prezıdentimen birinshi bolyp kezdesýiniń tereń máni bar – Qytaı CCTV arnasy
Qytaıdyń CCTV arnasynyń tilshisi óziniń beınereportajynda bıyl «Bir beldeý, bir jol» bastamasyna 10 jyl tolǵanyn atap ótti.
«Tóraǵa Sı Tszınpın «Bir beldeý, bir jol» ІІІ forýmy qarsańynda ondaǵan eldiń basshylarymen ekijaqty kelissózder ótkizýdi josparlap otyr. Bul kelissózderdiń alǵashqysy Qazaqstan Prezıdenti Toqaevpen bolady. Óıtkeni, «Bir beldeý, bir jol» jobasy bastaý alǵan jer retinde Qazaqstannyń Qytaı úshin mańyzy zor», – dedi tilshi.
BAQ Sı Tszınpınniń 2013 jyly Qazaqstan elordasy Astanada sóılegen sózinde «Jańa Jibek jolynyń ekonomıkalyq beldeýin birlesip qurý» bastamasyn usynǵanyn eske saldy.
Qytaı jýrnalısi Qazaqstan «Bir beldeý, bir jol» jobasy bastalǵan jer ǵana emes, sonymen qatar bul mańyzdy halyqaralyq bastamanyń júzege asyrýdyń úlgili qatysýshysy ekenin atap ótti. Budan bólek, jobany damytý úshin Qytaımen kóptegen birlesken kúsh-jiger jumsap jatqany málim etildi.
«Qytaı men Qazaqstan joǵary sapaly birlesken jumys arqyly halyqaralyq qaýymdastyqqa yntymaqtastyqtyń úlgisin kórsetti», – dedi tilshi.
CCTV arnasynyń habarlaýynsha, «Bir beldeý, bir jol» bastamasy usynylǵannan keıin bir jyl ótpeı jatyp, Qytaı men Qazaqstan Lıanıýngan logıstıkalyq yntymaqtastyq ortalyǵyn qurdy. Bul «Bir beldeý, bir jol» bastamasy aıasynda sátti júzege asyrylǵan alǵashqy halyqaralyq joba. Joba dúnıe júzindegi teńizge shyǵa almaıtyn eń iri memleket Qazaqstandy baıtaq teńizben baılanystyryp, Ortalyq Azııa men álem arasyndaǵy ekonomıkalyq jáne saýda baılanystaryn jaqyndata túsedi.
CCTV tilshileri vıdeoreportajda Qazaqstan men Qytaıdyń onjyldyq birlesken yntymaqtastyǵy arqyly Eýropa men Azııa arqyly tasymaldaý baǵytyn quryp, halyqaralyq logıstıka jáne kólik salasyndaǵy yntymaqtastyqty jańa deńgeıge kótergenin aıtty.
Dál osy sebepti «Bir beldeý, bir jol» ІІІ forýmy qarsańynda QHR Tóraǵasy birinshi bolyp Qazaqstan Prezıdentimen kezdesýdi jón kórgeni atap ótilgen.
Sı Tszınpın Qazaqstan Prezıdentimen kezdesip, budan da kóp nátıjege qol jetkizý úshin «Bir beldeý, bir jol» birlesken jumysyn ilgeriletýge daıyn – Qytaıdyń Sınhýa aqparat agenttigi
QHR Tóraǵasy Sı Tszınpın 17 qazan kúni Qazaqstan Respýblıkasynyń Prezıdenti Qasym-Jomart Toqaevpen kezdesti.
Sı Tszınpın «kóne dosymen» qaıta kezdesýge qýanyshtymyn dep atap kórsetti.
««Bir beldeý, bir jol» ІІІ halyqaralyq yntymaqtastyq sammıtine qatysý úshin Qytaıǵa qosh keldińiz. Salaýatty, turaqty jáne serpindi Qytaı men Qazaqstan qarym-qatynasy eki eldiń damýy men jandanýyna, sondaı-aq aımaqtyq beıbitshilik pen turaqtylyqqa yqpal etedi. Halyqaralyq jaǵdaı qalaı ózgerse de, Qytaı men Qazaqstan ózderiniń bastapqy umtylystaryn ustanyp, bir-birine kómektesip, tatý kórshilik pen dostyq uǵymyn urpaqtan-urpaqqa jetkizip, eki el arasyndaǵy turaqty jan-jaqty strategııalyq áriptestiktiń damýyna úzdiksiz járdemdesýi kerek» – dedi ol.
Sı Tszınpın budan 10 jyl buryn Qazaqstanda «Jibek jolynyń ekonomıkalyq beldeýin» birlesip qurý bastamasyn alǵash ret usynǵanyn basa aıtty.
Eki jaq budan da kóp nátıjege qol jetkizip, eki halyqqa jaqsyraq ıgilikke jetý úshin «Beldeý jáne jol» birlesken qurylysyn ilgeriletý úshin yntymaqtastyqty nyǵaıtýy kerek dedi.
Qytaısha sóıleıtin Prezıdent óziniń alma-materine qaıtyp keldi – Qytaıdyń «Jenmın jıbao» gazeti
Qytaıdyń «Jenmın jıbao» gazeti Prezıdent Qasym-Jomart Toqaevtyń Beıjiń til jáne mádenıet ýnıversıtetine saparyn «Qytaısha sóıleıtin prezıdent óziniń alma-materine qaıtyp keldi» degen taqyryppen jarııalady.
«Jenmın jıbao» gazetiniń habarlaýynsha, Q. Toqaev Beıjiń til jáne mádenıet ýnıversıtetinde bilim alyp, Beıjińde segiz jyl jumys istegen. Qazaqstannyń Memleket basshysy qytaı tilinde erkin sóıleı alady.
QR Prezıdenti Beıjiń ýnıversıtetin aralaý barysynda atalǵan JOO-da oqıtyn qazaqstandyq stýdenttermen kezdeskeni de jazyldy.