Qytaıǵa jalpy astyq eksporty 5,5 ese ósti – Qaırat Tórebaev

<p>ASTANA. KAZINFORM &ndash; Qazaqstan Italııaǵa 1 mln tonna bıdaı jetkizý úshin kelissóz júrgizip jatyr. Bul týraly Úkimet otyrysynda Caýda jáne ıntegratsııa vıtse-mınıstri Qaırat Tórebaev aıtty.</p>

«Qazaqstannyń 2024 jylǵa arnalǵan astyq daqyldary boıynsha eksporttyq áleýeti 12 mln tonna, onyń ishinde 7-7,5 mln tonna – bıdaı, 1,3-1,4 mln tonna – arpa, 300 myń tonna – júgeri. Sonymen qatar, maıly daqyldar boıynsha áleýet 1 mln tonnadan asady. Ortalyq Azııa men Aýǵanstanǵa 4,2 mln tonna bıdaı jetkiziledi dep kútilýde. Ótken jyly Qytaıǵa jalpy astyq eksporty 1,43 mln tonnany qurap, 2022 jylmen salystyrǵanda 5,5 ese ósti. Onyń ishinde bıdaıdyń úlesi - 538,8 myń tonna, ótken jylǵy kórsetkishten 15 ese artyq. Bul Qytaıǵa eksport kólemin 1,6 mln tonnaǵa deıin arttyrýǵa múmkindik beredi. Degenmen, Qytaı shekarasyndaǵy kidirister men lıtsenzııalaý sharttary áli de sheshýdi talap etedi», - dedi vıtse-mıınstr.

Onyń atap ótýinshe, jahandyq suranystyń artýy jáne ónimdiliktiń tómendeýine baılanysty Italııa, Latvııa, Ispanııa sııaqty EO elderi mańyzdy naryqtar bolyp otyr. Qazaqstan úshin bıdaıdy Reseı arqyly tranzıtteý jáne Transkaspıı halyqaralyq kólik baǵyty boıynsha shyǵyndardy azaıtý ózekti. Osy baǵyt arqyly Túrkııa men Taıaý Shyǵysqa shamamen 1 mln tonna bıdaı eksporttaýǵa múmkindik bar.

«Iranǵa arpa jetkizýdi qalpyna keltirý mańyzdy, saýda jáne logıstıka máseleleri sheshilýde. Pákistan, Indonezııa, Brazılııa jáne Malaızııa naryqtarynda qazaqstandyq bıdaı brendin ilgeriletý jumystary jandandyrylady. Azyq-túlik korporatsııasymen birlese otyryp, eksporttyq logıstıka men baǵalar kórsetilgen eldik usynystar ázirlendi. Bul usynystar Qazaqstannyń 14 turaqty ókildigine jiberilip, belsendi túrde jumys júrgizilýde. Armenııaǵa 600 myń tonna, Italııaǵa 1 mln tonna bıdaı jóneltý týraly kelissózder jasalyp jatyr. Sonymen qatar, Soltústik Afrıka elderine 200 myń tonna eksport boıynsha kelisimder júrgizilýde», - dedi Qaırat Tórebaev.