Qytaıǵa tórt túliktiń ishek-qaryny eksporttala ma

<p>ASTANA. KAZINFORM &ndash; Sońǵy ýaqytta QR Aýyl sharýashylyǵy mınıstrligi mal sharýashylyǵy ónimderiniń eksporttyq naryqtaryn ashý boıynsha belsendi jumys júrgizip jatyr.</p>

EAEO, TMD, Eýropalyq Odaq, Mońǵolııa, Grýzııa, Iran, Saýd Arabııasy, Birikken Arab Ámirlikteri jáne basqa da birqatar elge qazaqstandyq mal sharýashylyǵy ónimderiniń jekelegen túrlerin eksporttaýǵa qoıylatyn veterınarııalyq talaptar kelisilgen.

Budan bólek, Tájikstan, Bahreın, Katar, Kýveıt jáne Omanǵa mal sharýashylyǵy ónimderiniń eksporty jeńildetilgen tártippen júzege asyrylmaq.

«Qytaı naryǵyn ashý boıynsha úlken jumys júrgizildi, sonyń nátıjesinde Qazaqstannyń barlyq aýmaǵynan qus eti men ilespe ónimderdi, elimizdiń ońtústik-shyǵys aýmaǵynan ashatuıaqty janýarlar men tıisti ónimderdi ákelýge engizilgen shekteýler alynyp tastaldy. Qytaıǵa teri, ishek-qaryn ónimderine eksporttyq naryqtaryn ashý jónindegi jumys jalǵasýda», - delingen QR Aýyl sharýashylyǵy mınıstrliginiń baspasóz qyzmeti agenttik tilshisine bergen jaýabynda.

Jalpy, keshendi jospar aıasynda aýyl sharýashylyǵy ónimderin qaıta óńdeýdi damytýǵa 5 jyl ishinde 372 mıllıard teńgeden astam, onyń ishinde ınvestıtsııalyq maqsatqa 150 mıllıard teńge, aǵymdaǵy maqsattarǵa 222 mıllıard teńge bólý josparlanyp otyr.

Jospardy iske asyrý tamaq jáne qaıta óńdeý ónerkásibin damytýǵa, óńdeý ónimderiniń jalpy óndirisin 1,4 esege arttyrýǵa, sondaı-aq agroónerkásiptik keshenniń aýyl sharýashylyǵy ónimderin qaıta óńdeý úlesin ulǵaıtýǵa múmkindik beretinin atap ótken jón.