Qytaıdyń burynǵy premer-mınıstri Lı Ketsıan qaıtys boldy

<p>Qytaıdyń memlekettik aqparat quraldary burynǵy premer-mınıstr Lı Ketsıannyń qaıtys bolǵanyn habarlady. 68 jastaǵy Lı Ketsıan bıylǵy jyldyń basyna deıin Sı Tszınpınniń úkimet kabınetinde qyzmet etti.</p>

Qytaı memlekettik telearnasynyń habarlaýynsha, 68 jastaǵy Lı Ketsıan beısenbi kúni tún ortasynda júrek talmasyna ushyrap, «ony qutqarý áreketteriniń bári sátsiz aıaqtaldy». Ol sol kezde Shanhaıda bolǵan.

Lı Ketsıan 2013 jyly premer-mınıstr boldy jáne bir kezderi Qytaı Kommýnıstik partııasynyń yqtımal kóshbasshysy sanalǵan. Biraq sodan keıin Sı Tszınpın joǵarǵy basshy boldy. Lı Ketsıan osy jyldyń basynda zeınetkerlikke shyqqanǵa deıin premer-mınıstr qyzmetin atqardy.

Premer-mınıstr retinde Lı Ketsıan memlekettik bıýrokratııany reformalaýdy jáne jeke ekonomıkaǵa aralasýdy azaıtýdy jaqtady.

Lı Ketsıan 2020 jyldyń 28 mamyrynda ótken baspasóz máslıhatynda Qytaıdaǵy 600 mıllıonnan astam adamnyń ortasha aılyq tabysy 1000 ıýannan (shamamen 65 000 teńge) tómen ekenin atap ótti.

Qytaılyq jeli qoldanýshylary Weibo saıtyna Lı Ketsıannyń ólimi týraly habardy aýyr qabyldaǵannyn jazýda.

«(Ol) árqashan bizdiń júregimizde bolady», - dep pikir qaldyrdy bir qoldanýshy.

«Kútpegen habar boldy. Shyn júrekten kóńil aıtamyz», - dep jazdy Global Times Kommýnıstik partııa gazetiniń burynǵy bas redaktory Hý Sıjın.

Lı Ketsıan 1955 jyly shildede Qytaıdyń Anhoı provıntsııasyndaǵy Dınıýan qalasynda dúnıege kelgen. 1974 jyly naýryzda eńbek jolyn bastap, 1976 jyly mamyrda Qytaı Kommýnıstik partııasyna kirdi.

Pekın ýnıversıtetin bitirgen.

Zań ǵylymdarynyń bakalavry jáne ekonomıka ǵylymdarynyń doktory ǵylymı dárejesi bar.

1974 jyldan 1978 jylǵa deıin Anhoı provıntsııasynda jumys istedi.

1982 jyly Qytaı Kommýnıstik Jastar Odaǵy Ortalyq Komıtetiniń múshesi boldy.

1983 jyly Kommýnıstik Jastar Odaǵy Ortalyq Komıteti Hatshylyǵynyń orynbasary boldy.

1985 jyly Kommýnıstik Jastar Odaǵy Ortalyq Komıteti Hatshylyǵynyń hatshysy boldy.

1998 jyldan 2004 jylǵa deıin Qytaıdyń Henan provıntsııasynyń provıntsııalyq partııa komıtetiniń hatshysy jáne gýbernatory qyzmetterin atqardy.

2005 jyldan 2007 jylǵa deıin Lıaonın provıntsııasynyń provıntsııalyq partııa komıtetiniń hatshysy jáne gýbernatory qyzmetterin atqardy

2007-2008 jyldary QKP OK Saıası bıýrosynyń turaqty komıtetiniń múshesi boldy.

2008-2013 jyldary QKP OK saıası bıýrosynyń turaqty komıtetiniń múshesi jáne Qytaı premer-mınıstriniń orynbasary boldy.

2013-2023 jyldary QKP OK saıası bıýrosynyń turaqty komıtetiniń múshesi jáne Qytaı premer-mınıstri boldy.