Qytaıdan zańsyz ákelingen qus etiniń kózi joıyldy

<p>ASTANA. KAZINFORM — AShM veterınarııalyq baqylaý jáne qadaǵalaý komıtetiniń Shymkent qalasy boıynsha aýmaqtyq ınspektsııasy qalalyq prokýratýramen birlesken reıd ótkizdi.</p>

Tekserý barysynda Shymkent qalasynyń «Jibek joly» saýda ortalyǵynyń aýmaǵynda veterınarııalyq sertıfıkatsyz jáne basqa da qosymsha qujatsyz Qytaıdan ákelingen qus eti tabyldy.

Saýdagerden 35 070 kg et tárkilendi.

Veterınarııa týraly zańnyń 15-babyna sáıkes janýarlardan alynatyn ónimder men shıkizat — memlekettik veterınarııalyq-sanıtarııalyq baqylaý jáne qadaǵalaý obektileri.

Eýrazııa ekonomıkalyq odaǵynyń erejelerine sáıkes ımporttalatyn taýarlar tıisti jerge jetkizilgen kezde tolyq veterınarııalyq baqylaýǵa jatady.

Eger baqylaýdaǵy taýardyń shyǵý tegi onyń veterınarııalyq-sanıtarııalyq turǵydan qaýipsizdigin kýálandyratyn qujattarmen rastalmasa, taýar óndirýshi esebinen joıylýǵa nemese jóneltýshige qaıtarylady.

Anyqtalǵan qus etiniń barlyq partııasy Shymkent qalasynyń Aqtas kentiniń qalalyq qoqys jınaý ortalyǵynyń aýmaǵyndaǵy bekkarı shuńqyrynda óńdelip, joıyldy.

Onda dezınfektsııalyq is-sharalar júrgizildi, onyń ishinde et konteıneri men 9 «Gazel» júk kóligi óńdeý sharalarynan ótti.

Ákimshilik kodekstiń 406-babynyń 1-tarmaǵyna sáıkes jeke kásipkerge 50 AEK aıyppul salyndy.