Qytaıdan Qazaqstanǵa kelgen týrıster sany ósti: Ermek Marjyqpaev QHR týrızm mınıstrimen kezdesti

<p>ASTANA. KAZINFORM &ndash; QR Týrızm jáne sport mınıstri Ermek Marjyqpaev QHR Mádenıet jáne týrızm mınıstri Sýn Elımen kezdesti.</p>

Vedmstvo atap ótkendeı, taraptar kezdesý barysynda týrızm salasyndaǵy ekijaqty yntymaqtastyqty talqylady.

«Keıingi jyldary týrızm salasyndaǵy yntymaqtastyqty jandandyrý, týrıstik aǵymdy ulǵaıtý maqsatynda birqatar shara qabyldandy», - dedi mınıstr.

Máselen, 2023 jyly Qytaıdan Qazaqstanǵa kelgen týrıster sany birneshe ese artyp, 367 myń adamǵa jetken. Sonymen qatar byltyr 311 myń qazaqstandyq týrıst Qytaıǵa saparlaǵan. Bul – 2022 jylǵy kórsetkishpen salystyrǵanda eki ese kóp.

Mınıstr qazirgi tańda Qazaqstan men Qytaı arasyndaǵy áýe reıster sany aptasyna 44 reıske deıin jetkenin atap ótti.

«QHR Tóraǵasynyń Qazaqstanǵa memlekettik sapary aıasynda biz Qytaı medıa korporatsııasymen (SMG) eldiń týrıstik áleýetin ilgeriletý maqsatynda týrızm salasyndaǵy ózara túsinistik jáne yntymaqtastyq týraly memorandýmǵa qol qoıamyz», - dep atap ótti QR Týrızm jáne sport mınıstri kezdesý barysynda.

QHR Mádenıet jáne týrızm mınıstri Sýn Elı «Qytaıdaǵy Qazaqstan týrızmi jyly» aıasynda is-sharalar joǵary deńgeıde uıymdastyrylǵanyn atap ótip, eki el arasyndaǵy ekonomıkalyq, saýda jáne gýmanıtarlyq baılanystardy odan ári damytý úshin týrızm salasyndaǵy yntymaqtastyqty jalǵastyrýǵa daıyn ekenin jetkizdi.

Kezdesý sońynda Ermek Marjyqpaev qytaılyq áriptesine bıylǵy qyrkúıekte Qytaı Halyq Respýblıkasynyń Ulttyq quramasy óner kórsetetin 5-shi Dúnıejúzilik kóshpendiler oıyndary ótetinin aıtty.

2024 jyldyń jeltoqsanynda Almatyda «Qytaıdaǵy Qazaqstan týrızmi jylynyń» jabylý rásimin ótkizý josparlanýda.