Qytaıdan elimizge qandaı kontrafaktilik taýarlar ákelinedi

<p>Memlekettik kirister komıteti Qytaıdan elimizge qandaı kontrafaktilik taýarlar ákelinetindigin málimdedi, dep habarlaıdy QazAqparat tilshisi.</p>

«Kontrafaktilik taýarlardyń ishinen Qytaıdan jıi avtomobılderdiń qosalqy bólshekteri, sporttyq aıaq kıimder, galantereıalyq taýarlar, mobıldi telefondardyń qýattaǵyshtary ákelinedi», - dep atap ótedi vedomstvo agenttiktiń resmı saýalyna bergen jaýabynda.

Aıta keterligi, 2022 jyly úshinshi elderden ákelingen sheteldik taýarlarǵa qatysty syrtqy ekonomıkalyq qyzmetke qatysýshylardyń zııatkerlik menshik quqyqtaryn buzylý belgilerine baılanysty toqtatylǵan taýar deklaratsııalary boıynsha quqyq ıelenýshilerdiń ótinishteri negizinde Qazaqstan Respýblıkasynyń Ákimshilik quqyq buzýshylyq týraly Kodeksiniń 158-baby boıynsha 13 ákimshilik materıal toltyrylyp, sotqa jiberildi.

Bul materıaldar boıynsha sottyń sheshimimen 23 878 birlik kontrafaktili taýar tárkilenip, keıinnen joıyldy. Sondaı-aq syrtqy ekonomıkalyq qyzmetke qatysýshylarǵa 1 225 200 teńge somasynda aıyppul salyndy.