Qytaıdaǵy qazaq balýany Olımpıada joldamasyn jeńip aldy

<p>ASTANA. KAZINFORM &ndash; Ystanbul qalasynda ótken kúres túrlerinen Parıj olımpıadasyna álemdik irikteý týrnırinde Qytaıda turatyn qandasymyz Kabıran Abýshaımanuly Parıj olımpıadasynyń joldamasyn jeńip aldy.</p>

Qandasymyz Abýshaımanuly Ystanbuldaǵy álemdik irikteýde shırek fınaldan súrinbeı ótip, jartylaı fınalda qarsylasyna jol berdi. Alaıda, qola medal úshin talasta qarsylasyn aıqyn basymdyqpen utyp, úzdikter qataryna kirdi. Al Olımpıada joldamasy sarapqa salynǵan sheshýshi synda ózbekstandyq qarsylasyn 2:1 esebimen utyp, Parıj Olımpıadasyna joldamany jeńip aldy.

Osy oraıda qandasymyzǵa áleýmettik jeli arqyly baılanys jasap, jetistigimen quttyqtap, aldaǵy jospary týraly surap bilgen edik.

«Armanym – Olımpıada oıyndaryna qatysý bolatyn. Túrkııaǵa tek osy jetistikke qol jetkizý úshin kelgen edim. Maqsatym oryndaldy. Joldamany jeńip aldym. Endi, Parıj tórinde ótetin basty dodaǵa barymdy salyp daıyndalamyn. Eń basty maqsat Parıjde jeńis tuǵyrynan kóriný. Bul meniń ǵana emes, barlyq sport shynyń armany. Al armanǵa tek tynbaı ter tókken adam ǵana jetedi», dep qysqa ǵana jaýap berdi qandasymyz.

Aıta keteıik, 26 jastaǵy Kabıran Abýshaımanuly Qytaıdaǵy qazaqtar kóp qonystanǵan Tarbaǵataı aımaǵy Dórbljin aýdanynda dúnıege kelgen.

Ol osyǵan deıin Jazǵy Azııa oıyndarynda qola medal jeńip alsa, Azııa chempıonatynda kúmis júldege qol jetkizgen. Endi Túrkııadaǵy sońǵy álemdik irikteý týrnırinde Parıj olımpıadasynyń joldamasyn qanjyǵasyna baılady.

Sınhýa agenttiginiń habarlaýynsha, Qytaı quramasy kúres túrlerinen jalpy 11 joldama jeńip alǵan.

Atap aıtsaq, áıelder kúresinen 50 kg, 53 kg, 57 kg, 68 kg jáne 76 kg salmaqta, erkin kúresten 57 kg, 97 kg, 125 kg salmaqta, al grek-rım kúresinen 60 kg, 87 kg jáne 130 kg keli salmaqta Parıj olımpıadasyna barady.