Qytaıda shoshqanyń baýyryn adamǵa transplantatsııalaý operatsııasy sátti ótti

<p>ASTANA. KAZINFORM &mdash; Qytaı ǵalymdary baýyr jetkiliksizdigi bar naýqasty emdeý úshin genetıkalyq túrlendirilgen shoshqa baýyryn transplantatsııalaýdy sátti júzege asyrdy, dep habarlaıdy <a href="https://nauka.tass.ru/nauka/20272725" target="_blank" rel="noopener">TASS</a>.</p>

Qytaı Áskerı-áýe kúshteri medıtsınalyq ýnıversıteti basylymynyń habarlamasyna sáıkes, zertteýshiler shoshqa men adamnyń baýyryn biriktirip, qosymsha transplantatsııa jasaıdy, óıtkeni shoshqanyń baýyry adamnyń baýyrynyń qyzmetin tolyqqandy atqara almaıdy.

Operatsııa nátıjesinde jańa organ qan men óttiń júrýin qamtamasyz ete aldy. 96 saǵat ishinde aǵzanyń jańa organdy qabyldamaý sııaqty belgileri bolmaǵan. Naýqastyń medıtsınalyq zertteýlerge tegin qatysýyna onyń otbasy kelisim bergen.

Qytaıda baýyr aýrýymen aýyratyn 400 mıllıonǵa jýyq adam bar. Qytaılyq dárigerlerdiń zertteýi donorlyq organdardyń jetispeýshiligin jeńildetip, aýrýyn tek transplantatsııa arqyly ǵana jeńe alatyn naýqastarǵa kómektesedi.

Ksenotransplantatsııa boıynsha alǵashqy salystyrmaly túrdegi sátti tájirıbeler (bir bıologııalyq túrden ekinshisine) HH ǵasyrdyń ekinshi jartysynda júrgizildi. 1960 jyldary amerıkalyq transplantolog Kıt Remtsma shımpanzeden adamǵa 13 búırek transplantatsııasyn jasady. Onda patsıentterdiń kópshiligi operatsııadan keıin tórt-segiz apta ishinde qaıtys boldy. Bir naýqas toǵyz aı ómir súrip, tipti qysqa ýaqyt ishinde jumysqa qaıta oraldy.

2022-2023 jyldary shoshqa júregin transplantatsııalaý operatsııalary týraly kóp habarlandy, biraq eki naýqas medıtsınalyq protsedýradan keıin eki aı ýaqyt ótkende qaıtys boldy. 2024 jyldyń qańtarynda Pensılvanııa Ýnıversıtetiniń (AQSh) ǵalymdary shoshqanyń gendik modıfıkatsııalanǵan baýyryn mıy ólgen naýqasqa transplantatsııalady, biraq jańa organdy qabyldaý úshin ony retsıpıenttiń denesiniń syrtyna ornalastyrǵan edi.