Qytaıda ótken ilespe aýdarmashylar baıqaýynda qazaqstandyq stýdent úzdik atandy
Jalpy, baıqaý qorytyndysynda 8 úmitker 1-oryn júldesin jeńip aldy. Segiz chempıonnyń biri – Astanadan barǵan stýdent Aqerke Asylbekova qytaısha-oryssha aýdarma jáne qytaı-aǵylshynsha ilespe aýdarma baıqaýlarynda tamasha sheberlik kórsetti. Ol – Shanhaı shet tilder ýnıversıtetiniń kóptildi ilespe aýdarma baıqaýy qurylǵannan beri alǵash ret chempıon atanǵan sheteldik stýdent.
Aqerke 2017 jyly Shanhaıdaǵy Fýdan ýnıversıteti bakalavryna grant utyp alyp, oqýǵa túsken. 2021 jyly dıplomyn qorǵap shyǵyp, Astanadaǵy HQO jumys istep, 2022 jyly Shanhaı qalasyndaǵy Shet tilder ýnıversıtetiniń qytaı-orys-aǵylshyn tilderi aýdarmashysy mamandyǵyna magıstratýraǵa túsedi. Qazir sońǵy kýrsta oqyp júr.
Aıta ketsek, baıqaýǵa birneshe eldiń 72 ýnıversıtetinen 654 úmitker qatysty. Onyń ishinde 128 qatysýshy fınalǵa ótti. Konkýrs erejeleri Birikken Ulttar Uıymynyń jáne basqa da halyqaralyq uıymdardyń ilespe aýdarma erejelerine sáıkes 9 tilde, atap aıtqanda arab, frantsýz, nemis, japon, koreı, orys, ıspan, aǵylshyn jáne qytaı tilderinde ilespe aýdarmany qamtıdy.
Fınalda qatysýshylar belgilengen merzimde aldymen shet tilindegi mátindi qytaı tiline, sodan keıin qalǵan eki saıysker aýdarǵan qytaı tilindegi mátindi shet tilge aýdarýy qajet boldy. Bul relelik aýdarma ádisi ádette halyqaralyq uıymdarda qoldanylady. Baıqaýda qatysýshylardyń aýdarmashylyq qabileti tekserilip qana qoımaı, sonymen qatar psıhologııalyq kúıi jáne fızıkalyq kúshin synaıtyn naqty aýdarma stsenarıi ımıtatsııalandy.
Baıqaýdy Halyqaralyq ýnıversıtetter aýdarma ınstıtýttary konfederatsııasy (CIUTI) men Qytaı Aýdarmashylar qaýymdastyǵynyń aýdarma komıteti (TAC) birlesip uıymdastyrady. Qazylar alqasynda BUU Jenevadaǵy keńsesi Konferentsııalardy basqarý bóliminiń dırektory Rıma Al-Chıh (Rima Al-Cheeh), Halyqaralyq aýdarma ınstıtýttary keńesiniń (CIUTI) prezıdenti Bart DeFrank (Bart Defrank) jáne basqa da halyqaralyq uıymdardyń basshylary boldy jáne olar jeńimpazdarǵa sertıfıkattar men syılyqtardy tabys etti.