Qytaıda bıyl 2 mıllıonǵa jýyq ajyrasý jaǵdaıy tirkeldi

<p>BEIJІŃ. KAZINFORM — Qytaıda nekege turý kórsetkishi tómendep barady. 2016 jyly «bir otbasy, bir bala» saıasaty joıylǵanymen, Qytaıda bala týý kórsetkishi tómendep, halyqtyń qartaıý qarqyny artyp keledi, dep habarlaıdy Kazinform menshikti tilshisi.</p>

QHR Azamattyq ister mınıstrliginiń málimetinshe, 2024 jyldyń alǵashqy úsh toqsanynda 4,75 mln neke tirkelgen, bul bir jyl burynǵydan 943 myńǵa az.

Bul rette, vedomstvonyń málimetinshe, 2024 jyldyń osy kezeńinde ajyrasý sany 1,967 mln boldy.

Qytaıdaǵy halyq sanynyń azaıýy aıasynda QHR Memlekettik keńesi 28 qazanda «Týýdy yntalandyrý týraly» tsırkýlıar jarııalady.

Bıylǵy jyldyń 10 qazany men 30 qarashasy aralyǵynda Qytaıda halyq sanynyń ózgerýin anyqtaý úshin halyq arasynda iriktemelik demografııalyq zertteý júrgizilip otyr.

QHR Bas statıstıkalyq basqarmasyn (BSB) kelesi parametrler qyzyqtyrady: azamattyń jasy, jynysy, bilim deńgeıi, jumyspen qamtylýy, otbasy jaǵdaıy, balalardyń bolýy.

Qytaı halqynyń sany ekinshi jyl qatarynan azaıyp keledi. 2023 jyly Qytaı halqynyń sany 2,08 mln adamǵa azaıyp, 1,409 mlrd boldy.

Buǵan deıin habarlaǵanymyzdaı, Qytaıda sońǵy eki jylda 20 myńnan astam balabaqsha jabyldy.