Qytaıda Aı kúntizbesi boıynsha jańa jyl bastaldy
Qańtar aıynyń sońynda QHR Saýda mınıstrligi 2024 jyldy «Tutynýdy yntalandyrý jyly» dep jarııalady. «Kóktem merekesi» qarsańynda eldiń birqatar qalalarynda, sonyń ishinde Beıjińde Aı kúntizbesi boıynsha jańa jylǵa arnalǵan kórmeler men jármeńkeler ótti.
Jergilikti BAQ-tyń habarlaýynsha, 10 aqpanda bastalǵan kóktem merekesi kezinde elde tutyný serpilisi bolady dep kútilýde. Bıyl Qytaı úkimeti pandemııadan keıingi qalpyna keltirýden tutynýdyń turaqty ósimine kóship, ishki suranysty arttyrýǵa nazar aýdarady.
Sonymen qatar, týrızmniń serpini jáne aımaqaralyq jolaýshylar aǵynynyń aıtarlyqtaı artýy baıqalady.
QHR Kólik mınıstrliginiń boljamynsha, Jańa jyl merekesine oraı halyqtyń maýsymdyq kóshi-qony kezinde qytaılyqtar 9 mlrd-qa jýyq saıahat jasaıdy. «Chýnıýn»-niń birinshi kúninde ǵana 190 mln-ǵa jýyq jolaýshy reısi jasaldy, bul ótken jylmen salystyrǵanda 20 paıyzǵa artyq.
Mereke kúnderi qytaılyq týrıster shetelge týrıstik saparlarǵa shyǵady. Osylaısha, «Chýntsze» kezeńinde Qytaıdan Sıngapýr, Malaızııa jáne Taılandqa saparlaýǵa tapsyrys sany ótken jylmen salystyrǵanda 15 ese ósti.
Bıyl Qytaıda jańajyldyq merekeler aqpannyń 10-ynan 17-ine deıin jalǵasady.
Dástúrge sáıkes, aı kúntizbesi boıynsha Jańa jyldy toılaýǵa daıyndyq bir apta buryn «kishi Jańa jyl» («sıaonıan») dep atalatyn merekeden bastalady. Árıne, qazirgi ýaqytta Qytaı azamattary bul tártipti ustanbaıdy. Alaıda, «Chýntsze» merekesine deıin ádette úıdi tazalap, ótip jatqan jyldyń sátsizdigimen baılanysty barlyq «eski zattardan» qutylý ádetke aınalǵan. Úlkender men balalar terezege ilinetin qyzyl qaǵazdan órnekter qıyp, úıdiń kireberisterin shamdarmen bezendiredi, jańa jyldyq tilekter jazylǵan juptyq jazýlar jazyp, olardy úıdiń esikterine iledi.
Qytaılyqtar kóktem merekesin ádette otbasylarymen birge toılaıdy. Úıden jyraqta jumys isteıtin nemese oqıtyndar shaǵyn atamekenine ata-anasymen, jaqyn týystarymen qaýyshý úshin keledi.
Merekelik apta ishinde Qytaı astanasynyń turǵyndary men qonaqtary saıabaqtarǵa jáne basqa da ashyq týrıstik oryndarǵa tegin kirýge, sondaı-aq Beıjińniń qala mańyndaǵy aýdandaryna shosse joldarmen tegin júrýge múmkindik alady.
Dástúr boıynsha, Jańa jyl bastalǵannan keıingi alǵashqy úsh kúnde shash jýýǵa nemese kesýge, úı jınaýǵa bolmaıdy, óıtkeni bul «baılyq joǵaltýdy» bildiredi.
2024 jylǵy «Aıdahardyń» qamqorlyǵymen ótetin Kóktem merekesi 10 aqpanda bastaldy.
Qytaıda Aı kúntizbesi boıynsha Jańa jyldy toılaý eki aptaǵa sozylyp, 24 aqpanda Shamdar festıvalimen («ıÝansıaotsze») aıaqtalady.