Qytaı spýtnıkteri kóbeıip keledi: Prezıdent keńesshisi zań qabyldaýda keshikpeý keregin aıtty

<p>ASTANA. KAZINFORM &ndash; QR Prezıdentiniń keńesshisi Qýanyshbek Esekeev sheteldik iri spýtnık operatorlaryn Qazaqstanda lokalızatsııalaýdyń mańyzdylyǵy týraly pikir bildirdi.</p>

Astana Hub alańynda Tsıfrlyq damý, ınnovatsııalar jáne aeroǵarysh ónerkásibi mınıstrligi uıymdastyrǵan «Telekommýnıkatsııalar týraly» zań jobasyn ázirleý týraly strategııalyq sessııa ótip jatyr.

Q.Esekeev Qazaqstandaǵy teledıdar naryǵynyń damýy týraly aıtyp, 2010 jyly bastalǵan tsıfrlyq televızııany engizýdiń keshigýi naryqqa aıtarlyqtaı ózgerister alyp kelgenin atap ótti.

– 2010 jyly memleket televızııa naryǵyn qurýdy bastady, onda tsıfrlyq televızııany óte jyldam engizý josparlanǵan edi. Osy jyldy alsaq, joba 12 jylǵa sozylyp keledi. Osy 12 jylda naryqta qandaı ózgerister bolǵanyn kórdik. Reseılik operatorlar lıtsenzııasyz-aq naryqta qyzmet ete bastady. Qazirdiń ózinde Qazaqstanda shamamen mıllıon reseılik abonent bar. Tsıfrlyq televızııany damytýdyń baıaý júrýi naryqtyń qatty túrlenýine ákeldi. Qazirgi ýaqytta televızııa naryǵyn tek mobıldi operatorlar qalyptastyryp otyr, al dástúrli naryq, mysaly, kabeldik televıdenıe arqyly jetkizý múldem joıyldy. Al Reseıde, kerisinshe, kóptegen dástúrli kabeldik operatorlar ınternet pen televıdenıeni birge usynady, – deıdi Prezıdent keńesshisi.

Onyń aıtýynsha, ýaqytynda qabyldanbaǵan zań normalary tutas ındýstrııany joıyp jiberdi. Búginde osyndaı jaǵdaı telekommýnıkatsııalar naryǵynda da qaıtalanýy múmkin.

– Negizinde, qazir baılanys naryǵy dál osyndaı kezeńdi bastan ótkerip jatyr. Mysaly, Nıgerııada Starlink óte jyldam operator atandy. Al rettelmegen qyzmet kórsetý telekommýnıkatsııa naryǵynyń qaıta qurylýyna ákep soqty. Klassıkalyq uıaly baılanys bıznesinde standarttar tartysy men jıilikter úshin kúres bolsa, ınternet jetkizý salasynda – orbıtalyq spýtnık operatorlary qatysatyn úlken básekege toly naryqqa kez boldyq. Eń iri operator – Starlink, sonymen qatar AST Mobile mobıldi operatorlarmen jumys isteýdi bastady. Meniń oıymsha, jańa zańnamalyq sharalar qazir óte mańyzdy, biz naryqtaǵy tarıhı qatelikterdi qaıtalamaýymyz kerek, – dep atap ótti Esekeev.

Osyǵan baılanysty Q.Esekeev retteýshi organdardy sheteldik kompanııalardy elde lokalızatsııalaý máselesine erekshe nazar aýdarýǵa shaqyrdy.

– Eger olar lokalızatsııalanbasa, bizdiń naryq avtokólik naryǵy sııaqty lyq tolady. Qazir Qytaıda qanshama óndirýshi baryn kórip otyrsyzdar, Qytaıdyń shamamen úsh iri spýtnık kompanııasy bar, olar orbıtaǵa 15-20 myńdaı spýtnık ornalastyrýdy josparlap otyr. Bul naryqtyń qurylymyn aıtarlyqtaı ózgertetini anyq, – dep túıindedi ol.

Buǵan deıin Qazaqstan poıyzdarynda ınternet qashan paıda bolatyny habarlanǵan edi.