Qytaı SІM: Qazaqstanmen mańyzdy is-sharalardy joǵary deńgeıde birlesip ótkizýge daıynbyz

<p>ASTANA. KAZINFORM - Qytaı Qazaqstanmen damý strategııalaryn ushtastyrýdy jalǵastyrýǵa, ózara tıimdi yntymaqtastyqty tereńdetýge, bıylǵy mańyzdy is-sharalardy joǵary deńgeıde birlese ótkizýge, eki el basshylarynyń kelisiminen naqty nátıje shyǵara otyryp, qytaı-qazaq qarym-qatynasyn jańa bıikke kóterýge daıyn. Bul týraly Qytaı Syrtqy ister mınıstrliginiń resmı ókili Go Tstszıakýn aıtty.</p>

Sınhýa agenttiginiń jazýynsha, 7 qańtar kúni ótken brıfıngte jýrnalısterdiń biri «Qazaqstan Prezıdenti Toqaev jaqynda bergen suqbatynda «Qytaı úshin Qazaqstan – asa mańyzdy strategııalyq seriktes. Qarqyndy ári jan-jaqty damyp kele jatqan qazaq-qytaı yntymaqtastyǵy, shyn máninde, máńgi strategııalyq seriktestik deńgeıine jetti. Qytaımen jan-jaqty yntymaqtastyqty odan ári damytý qazaq dıplomatııasyndaǵy mańyzdy mindettiń biri bolyp qala beredi. 2023 jyly Qazaqstan men Qytaı arasynda ózara vızasyz rejım ornatyldy. Jańa bastama alys-beristi damytýǵa jáne eki halyqtyń dostyǵyn nyǵaıtýǵa oń áserin tıgizip jatyr. Qazaqstan azamattary Qytaıdy jańa qyrynan tanyp, onyń tehnologııalyq turǵydan alyp memleketke aınalǵanyna kóz jetkize bastady. Qytaı jurty da bizdiń otandastarymyzǵa dostyq peıil tanytyp otyr1 dep atap kórsetti. Siz buǵan ne aıtasyz?» dep suraǵan.

Buǵan jaýap retinde Go Tszıakýn Qytaı men Qazaqstannyń jaqyn kórshi, jaqsy dos jáne senimdi áriptester ekenin atap ótti.

- Prezıdent Toqaev atap ótkendeı, Qytaı men Qazaqstannyń yntymaqtastyǵy jan-jaqty jáne qarqyndy damyp keledi. Sońǵy jyldary Tóraǵa Sı Tszınpın men Prezıdent Toqaevtyń strategııalyq jetekshiligi jáne tikeleı qamqorlyǵynyń arqasynda Qytaı men Qazaqstannyń túrli saladaǵy yntymaqtastyǵy damýdyń dańǵyl jolyna tústi, - dedi resmı ókil.

Go Tszıakýnnyń aıtýynsha, 2024 jyl qytaı-qazaq qarym-qatynasynyń tarıhyndaǵy taǵy bir «berekeli jyl» boldy. QHR Tóraǵasy Sı Tszınpın Qazaqstanǵa memlekettik saparmen baryp, Prezıdent Toqaevpen eki eldiń qarym-qatynasyna baılanysty mańyzdy ýaǵdalastyqqa qol jetkizdi. Resmı ókildiń pikirinshe, Bul ekijaqty yntymaqtastyqqa qýatty serpin berdi.

- Eki el arasynda túrli deńgeıdegi delegatsııalarynyń saparlary jıilep, saýda-ekonomıkalyq yntymaqtastyq qarqyndy ósip keledi, óndiristik qýat, ózara baılanys, aýyl sharýashylyǵy jáne jańa energııa kózderi sekildi salalardaǵy yntymaqtastyq alǵa jyljı tústi. Gýmanıtarlyq saladaǵy yntymaqtastyq jańa jetistikterge qol jetkizip, halyqtar arasyndaǵy barys-kelis rekordtyq deńgeıge jetti, - dep atap ótti Go Tszıakýn.

Aıta keteıik, Prezıdent Qytaı Halyq Respýblıkasynyń tóraǵasyna kóńil aıtty.