Qytaı ishki tutynýdy yntalandyrý sharalaryn qabyldaıdy

<p>ASTANA. KAZINFORM - Qytaı Halyq Respýblıkasy Saýda mınıstriniń orynbasary Shen Tsıýpınniń málimdeýinshe, Qytaı bıyl tutynýdy arttyrý úshin kólik quraldary men turmystyq tehnıkany satyp alýdy yntalandyrý sııaqty birqatar sharalardy engizedi.</p>

«Avtomobılder, turmystyq tehnıka jáne úıge arnalǵan jıhaz - dástúrli tutyný zattary jáne adamdardyń ómirimen tyǵyz baılanysty», - dedi Shen Tsıýpın.

Onyń aıtýynsha, Qytaı bıligi bıyl halyq arasynda suranystyń joǵary bolýyna jáne olardy aýystyrý áleýetine baılanysty eski kólikterdi jańasyna aıyrbastaý mehanızmin ilgeriletý jumystaryn júrgizetin bolady.

2023 jyly Qytaıda jańa kólikterdiń satylymy alǵash ret 30 mln birlikten asty, bul ótken jylmen salystyrǵanda 12%-ǵa kóp. Elde eski kólikter saýdasynyń kólemi 18,41 mln birlikke jetip, ósim 15 %-dy quraǵan. 

Vıtse-mınıstrdiń aıtýynsha, Qytaıda kólik ıeleriniń sany 340 mln-ǵa jetken. El bul kórsetkish boıynsha álemde birinshi orynda tur.

Qytaı sonymen qatar ishki suranysty yntalandyrý sharalary aıasynda eski turmystyq tehnıkany jańasyna aýystyrýda. Mysaly, tońazytqyshtar, kir jýǵysh mashınalar jáne kondıtsıonerler sııaqty turmystyq tehnıkanyń negizgi sanattarynyń sany 3 mlrd birlikten asady. Mınıstrliktiń málimetinshe, keıbir turmystyq zattar 10-20 jyldan astam qoldanysta bolǵan.

Budan basqa, Qytaı bıligi tutyný áleýetin ashý úshin transshekaralyq elektrondyq kommertsııa, jańa energetıkalyq kólik quraldary (NEVs) jáne China-chic sııaqty tutynýdyń jańa túrlerin yntalandyrýǵa nıetti.

Buǵan deıin QHR Saýda mınıstrligi 2024 jyldy «Tutynýdy yntalandyrý jyly» dep jarııalaýdy usynǵan bolatyn.