Qytaı mektepterinde vırýs taralýynyń aldyn alý sharalary kúsheıtildi

<p>Qytaıdyń mektep pen balabaqshalarynda qys mezgilinde jedel respıratorlyq aýrýlardyń (JRA) aldyn alý jáne baqylaý sharalary kúsheıtilip jatyr. Bul týraly QHR bilim mınıstrliginiń málimdemesinde aıtylǵan, dep habarlaıdy <a href="https://kaz.inform.kz/" target="_blank" rel="noopener">Kazinform</a> menshikti tilshisi.&nbsp;&nbsp;</p>

Vedomstvo aqparatynda eldegi mektep pen balabaqshalarda maýsymdyq ınfektsııalyq aýrýlardyń aldyn alý jáne kúres salasyndaǵy epıdemıologııalyq baqylaý jáne aǵartýshylyq jumysty kúsheıtý qajettigi aıtylǵan.

Bastaýysh jáne orta mektepterde, sondaı-aq balabaqshalarda tańerteń jáne kúndiz balalardy qarap, tekserýdi engizip, ınfektsııalyq aýrýlar tarap jatqan jaǵdaıda jumysty dereý úılestirý sharalaryn kúsheıtý qajet.

Qujatta oqýshylardyń densaýlyǵyna basa nazar aýdaryp, onlaınnan oflaın oqýǵa birtindep kóshý keregi, vaktsınatsııa baǵdarlamalary boıynsha jumysty úılestirý qajeti atap ótilgen.

Buǵan deıin QHR Densaýlyq saqtaý máseleleri memlekettik komıtetiniń resmı ókili Mı Fenniń habarlaýynsha, monıtorıng keıingi kezderi respıratorlyq aýrýlardyń kóshin tumaý bastap turǵanyn kórsetken.

Sondaı-aq rınovırýs, mıkroplazmalyq pnevmonııa, respıratorlyq-sıntsıtıaldik vırýs, adenovırýs keń taraǵan.

Qytaıdyń aýrýlardyń aldyn alý jáne baqylaý ortalyǵynyń sarapshylary qazirgi epıdemıologııalyq ahýal kezinde QHR turǵyndaryna ımmýndaý protsedýrasyna júginip, múmkindiginshe, vaktsınatsııa usynysyna sáıkes ekpe alýdy usyndy. 

Qarashada Dúnıejúzilik densaýlyq saqtaý uıymy, aqparat boıynsha Qytaıdyń soltústiginde taraı bastaǵan pnevmonııanyń belgisiz túriniń oshaqtary týraly qolda bar málimetterdiń bárin suraǵanyn jazǵan bolatynbyz.