Qytaı kompanııalary elimizdiń sý salasyn tsıfrlandyrýǵa atsalyspaq

<p>ASTANA. KAZINFORM &ndash; QHR Tóraǵasy Sı Tszınpınniń Qazaqstanǵa memlekettik sapary aıasynda Sý resýrstary jáne ırrıgatsııa mınıstri Nurjan Nurjigitov birqatar qytaılyq iri kompanııalarmen kezdesý ótkizdi.</p>

Mınıstr eń aldymen Qytaı azamattyq ınjenerlik-qurylys korporatsııasynyń vıtse-prezıdenti Tszıan Igaomen kezdesti. Kompanııa Qazaqstanda 2017 jyldan beri jumys isteıdi. Qazirgi ýaqytta Qytaı azamattyq ınjenerlik-qurylys korporatsııasyń Jambyl oblysyndaǵy ırrıgatsııalyq arnalardy, drenaj júıeleri men qurylystardy rekonstrýktsııalaýdy qosa alǵanda, aýqymdy 5 jobany iske asyryp jatyr.

Taraptar sýarý júıelerin tsıfrlandyrý jáne osy baǵyttaǵy ekijaqty yntymaqtastyqty talqylady. Qytaı azamattyq ınjenerlik-qurylys korporatsııasynyń ókilderi Qazaqstannyń sý salasyn tsıfrlandyrý jáne avtomattandyrý boıynsha jańa jobalarǵa qyzyǵýshylyq tanytty.

«Tsıfrlyq tehnologııalar daqyl túrlerine, klımatqa jáne aýmaqqa baılanysty sýdy dál jáne ýaqtyly bólýdi qamtamasyz ete otyryp, sý resýrstaryn basqarýdyń tıimdiligin aıtarlyqtaı arttyrýǵa múmkindik beredi. Birlesken kúsh–jiger, resýrstar men tájirıbeni paıdalana otyryp aldymyzda turǵan maqsattarǵa qol jetkize alatynymyzǵa senimdimin», - dedi Nurjan Nurjigitov.

Odan keıin mınıstr CITIC Gonstruction kompanııasynyń prezıdenti Tszıantsıan ıAnmen kezdesip, sý únemdeý tehnologııalaryn engizý máselesin talqylady. Qytaılyq kásipkerler Qazaqstanda sý únemdeý júıelerin shyǵarýǵa daıyn ekendikterin bildirdi.

Nurjan Nurjigitov óz kezeginde jańa sý qoımalaryn salý jáne qoldanystaǵy sý qoımalaryn rekonstrýktsııalaý, sondaı-aq Almaty men Jetisý oblystaryndaǵy sýarý júıelerin jańǵyrtý jónindegi mınıstrliktiń josparlary týraly aıtyp berdi.

Sondaı-aq, mınıstr Power China kompanııasynyń prezıdenti Tan Sıaofenmen kezdesti. QR Sý resýrstary jáne ırrıgatsııa mınıstrligi men Power China qazaqstandyq sý sharýashylyǵy mamandaryn Qytaıda biliktilik arttyrý kýrstarynan ótedi dep kelisti.

Sonymen qatar, Nurjan Nurjigitov qytaılyq kompanııaǵa «Qazsýshar» kásipornymen yntymaqtastyq týraly Memorandýmǵa qol qoıýdy usyndy. Power China basshylyǵy bolsa jańa sý qoımalarynyń qurylysyna qatysýǵa nıet bildirdi. Bul máseleni egjeı-tegjeıli talqylaý aldaǵy ýaqytta jumys toby deńgeıinde jalǵasady.

«Power China Qazaqstanda burynnan tabysty jumys istep keledi. Kompanııa bizdiń elimizde birneshe aýqymdy jobany júzege asyrdy, sondyqtan biz ózara tıimdi yntymaqtastyqqa nıettimiz. Bul bizdiń birlesken jobalarymyzdy ǵylymı súıemeldeýdi tıimdirek etedi», - dedi Nurjan Nurjigitov.

Mınıstrdiń China Energy International Group kompanııasynyń basqarma tóraǵasy Lıý Tszesıanmen kezdesýinde Qazaqstannyń sý qoımalarynda sý elektr stantsııalarynyń qurylysy talqylandy. Qytaılyq kásipkerler atalǵan jobaǵa qyzyǵýshylyq tanytty. Taraptar bul máseleni tolyǵyraq talqylaýǵa kelisti.

China Energy International Group ókilderi Qazaqstannyń sý salasyn tsıfrlandyrý jáne avtomattandyrý jobalaryna qatysýǵa nıet bildirdi. Sonymen qatar, qytaılyq kompanııa elimizde aǵyndy sýlardy tazartý qondyrǵylaryn ornatýǵa daıyn.