Qytaı qazaqstandyq arpany eń iri ımporttaýshyǵa aınaldy

<p>ASTANA. KAZINFORM &ndash; Bıylǵy maýsymda Qazaqstanda arpa óndirisi artady. Bul málimetterdi AQSh Aýyl sharýashylyǵy mınıstrligi <a href="https://apps.fas.usda.gov/newgainapi/api/Report/DownloadReportByFileName?fileName=Grain%20and%20Feed%20Annual_Astana%28Nur-Sultan%29_Kazakhstan%20-%20Republic%20of_KZ2024-0003.pdf" target="_blank" rel="noopener">analıtıkalyq esebinde</a> keltiredi. Óndirýshiler ónimdilik boljamynyń joǵary bolýyna baılanysty óndiris kólemin 3,25 mıllıon tonnaǵa baǵalap otyr.&nbsp;</p>

«2023/24 marketıngtik jyly ótken jylmen salystyrǵanda arpa egis alqabynda shamaly ózgeris bolady dep kútilýde. Astyq óndirýshiler arpa óndirisin 2024/25 jj. 3,25 mln tonna deńgeıinde baǵalap otyr, bul 13 ts/ga joǵary ónimdilik boljamyna baılanysty. Astyq saýdagerlerinen alynǵan aldyn ala baǵalaýlar boıynsha ónim boljamy 17 paıyzǵa artady», - delingen qujatta.  

Kóptegen arpa dıqany otandyq jem-shóp ónerkásibiniń suranysynyń joǵary bolýyna baılanysty aldaǵy maýsymda arpa egýdi jalǵastyrýǵa nıetti ekenin bildirdi. Degenmen amerıkandyq sarapshylar arpa egý jospary naryqta qoljetimdi tuqymnyń jetispeýshiligine baılanysty kúmán týdyrýy múmkin ekenin atap ótti. 

Arpa eksporty 2024/25 jyldary joǵary óndiris perspektıvalaryna baılanysty 1,5 mıllıon tonnaǵa baǵalanady. Bul baǵa básekege qabiletti eksporttyq baǵalarǵa jáne treıderlerdiń Qytaıdan kúshti suranys kútýlerine negizdelgen.

2024 jyldyń 12 sáýirinen bastap EAEO elderinen bıdaıdyń avtomobıl, sý jáne temirjol kóligimen ımportyna tyıym salý taǵy alty aıǵa uzartylǵandyqtan, bılik Qazaqstanǵa arpa men maıly daqyldar ımportynyń artqanyn habarlady. Osy aqparatqa súıene otyryp, 2024/25 jyldaǵy arpa ımporty 0,5 mıllıon tonnaǵa baǵalanady. Sondaı-aq óndiristiń ulǵaıýy eksporttyń da ulǵaıýyna ákeldi: 2023/2024 jyldyń shilde-aqpan aılary aralyǵynda eksport 939 myń tonnany qurady. Bul ótken jyldyń sáıkes kezeńimen salystyrǵanda 30%-ǵa derlik artyq. 

Marketıngtik jyl basynan beri Qytaı qazaqstandyq arpanyń eń iri ımporttaýshysy boldy. Qytaı ımporty ótken jyldyń sáıkes kezeńimen salystyrǵanda 4 esege jýyq ósip, 723 myń tonnany qurady. Bul ósim mal azyǵyna suranystyń joǵary bolýymen jáne basqa jetkizýshilermen salystyrǵanda qazaqstandyq arpanyń Qytaı úshin salystyrmaly túrde qolaıly baǵasymen túsindiriledi. 

Ózbekstan arpanyń ekinshi ımporttaýshysy boldy (123 myń tonna). Bul rette Irannyń ımporty 41 myń tonnaǵa deıin, ıaǵnı, 87%-ǵa tómendedi. Saýdagerler Irannyń reseılik arpaǵa kóshýin jalǵastyryp jatqanyn atap ótti.