Qytaı qazaǵy Toqtarbek Tańatqan Parıj Olımpıadasynda Nurbek Oralbaımen judyryqtasýy múmkin

<p>ASTANA. KAZINFORM -&nbsp; Qazaqstandyq boksshy Nurbek Oralbaı birinshi ret Olımpıadada baq synaıdy. Ol Parıjde 80 keli salmaqtyń kil myqtylarymen kúsh synasady. Olardyń qatarynda Qytaıda turatyn qandasymyz Toqtarbek tańatqan da bar.</p>

Toqtarbek Tańatqan osydan birer kún buryn vıdeoúndeý jarııalap, otandastarynyń úmitin aqtap, Parıjde Qytaıdyń qyzyl týyn jelbiretýdi maqsat etip otyrǵanyn málim etti.

Esterińizge sala keteıik, Jazǵy oıyndarǵa Nurbek álem chempıony statýsynda attanady. 2023 jyly Tashkentte ótken álem birinshiliginiń fınalynda ol Toqtarbek Tańatqandy jeńip, álem chempıony ataǵyna qol jetkizgen bolatyn. Alaıda eki boksshy keıin Hanchjoýdaǵy Azııa oıyndarynda kezdesip, Toqtarbek ese qaıtaryp, chempıondyq ataqpen birge Olımpıada joldamasyn jeńip alǵan edi. Endi eki qazaq boksshysynyń joly Parıj Olımpıadasynyń sharshy alańynda da túıisip qalýy ábden múmkin.

Jasyrary joq, Qytaıda turatyn qandasymyz Toqtarbek Tańatqan otandasymyz Nurbek Oralbaımen Parıjde joldary túıisip jatsa, esh aıanyp qalmasy anyq. Sebebi Toqtarbek te 80 keli salmaqtaǵy úzdikterdiń biri jáne medal alatyn áleýeti de zor.

Degenmen eki qazaq boksshysynan da áleýeti joǵary taǵy bir boksshy bar. Ol – kýbalyq Arlen Lopes. Kýbalyq qabylan Olımpıadanyń altynyn eki ret jeńip aldy. 2016 jyly Rıoda 75 kelide top jarsa, Tokıo oıyndarynda 81 kelide qarsylas shydatpaǵan edi. Álem chempıony kásibı rıngte de úsh kezdesý ótkizip úlgergen. Endi áıgili kýbalyq boksshy Olımpıadanyń úshinshi altynynan úmitti ekeni aıtpasaq ta belgili. Sonymen qatar ýkraınalyq Aleksandr Hıjnıak ta bul salmaqtaǵy basty favorıtter qatarynda. Álem chempıony atanǵan Hıjnıak úshin Tokıo oıyndary sátsiz aıaqtaldy.

Jalpy, 80 kelidegi básekelester deńgeıi joǵary. Olımpıadanyń sánin keltiretin de osy baqtalastyq bolmaq. Olımpıada medali úshin Nurbek te, Toqtarbek te aıanyp qalmasy anyq.