Qytaı Qazaqstannan mal sharýashylyǵy ónimderin ákelýge qoıylǵan shekteýlerdi alyp tastady
Qus sharýashylyǵy ónimderin ákelýge tyıym salý 2005 jyldan bastap jalǵasyp keledi, al aýsyl boıynsha shekteýler 2022 jyly engizilgen edi. Shekteýlerdi alyp tastaý QR ońtústik-shyǵys óńirlerinen Qytaıǵa muzdatylǵan sıyr jáne shoshqa etin, sondaı-aq, qus sharýashylyǵy ónimderiniń keń aýqymyn eksporttaýdy qaıta bastaýǵa múmkindik beredi.
Eń mańyzdysy endi Qazaqstan eksporttyq taýarlar jelisin keńeıtý boıynsha veterınarlyq talaptardy kelisý rásimin, sondaı-aq Qazaqstannyń barlyq aýmaǵynan kásiporyndardan eksporttaýǵa kelisim alý boıynsha jumysty bastaı alady.
Tyıym salýlardy alyp tastaý týraly sheshim QR Prezıdenti Qasym-Jomart Toqaevtyń 2023 jyly QHR-ǵa resmı saparynan keıin qabyldandy. Osy sapary barysynda Memleket basshysy Qazaqstannyń Qytaıǵa mal sharýashylyǵy ónimderin jetkizýge daıyn ekenin atap ótken edi.
QR Premer-Mınıstriniń orynbasary Serik Jumanǵarın de kórshi eldiń tıisti salalarymen birqatar kelissózder júrgizdi. Al, 2023 jylǵy qarashada QR Aýyl sharýashylyǵy mınıstri Aıdarbek Saparov QHR Bas keden basqarmasynyń tóraǵasy ıÝı Tszıanhýamen resmı kezdesý ótkizgen bolatyn.
2023 jyly qytaılyq tarap qus tumaýy men aýsyl boıynsha qaýip-qaterge baǵalaý júrgizdi. Jeltoqsan aıynda QHR GTÝ sarapshylar toby men QHR Aýyl sharýashylyǵy jáne aýyldyq ister mınıstrliginiń Qazaqstanǵa sapary aıasynda joǵaryda atalǵan aýrýlarǵa jetkilikti baqylaýdy qamtamasyz etý turǵysynan veterınarııalyq qadaǵalaý qyzmetine aýdıt júrgizildi.
QR Aýyl sharýashylyǵy mınıstrligi Qytaıǵa eksportqa baǵyttalǵan kásiporyndar tizilimin keńeıtý boıynsha jumysty jalǵastyrady. Bul oqıǵa qazaqstandyq agrobızneske óz ónimderin aspan asty eliniń naryǵyna shyǵarýǵa jańa múmkindikter ashady.