Qytaı eliniń iri kompanııalary Abaı oblysymen yntymaqtastyq ornatýǵa daıyn
«Qytaı – bizdiń aımaqtyń negizgi saýda-ekonomıkalyq seriktesi. Bıyl qańtar-qazan aılarynda Abaı oblysynyń jalpy taýar aınalymynyń 92% nemese 266 mıllıon AQSh dollary Qytaı óńirlerimen shekaralyq saýda arqyly qamtamasyz etilgen. Máselen, eksport 178 mıllıon AQSh dollaryn, Qytaı ónimderiniń ımporty shamamen 88 mıllıon AQSh dollardy qurady», - dedi Nurlan Uranhaev.
Sapar aıasynda oblystan arnaıy barǵan delegatsııa «San Bao» Shyńjań saýda-ónerkásiptik korporatsııasy» JShS-niń basshylyǵymen kezdesti. Bul korporatsııa – Qytaı eliniń eń iri eksporttyq-ımporttyq saýda, shetelde qurylys jobalary arqyly kelisimshart jasaý, óndiris pen óńdeý, qoıma jáne logıstıka, týrıstik saýda qyzmetterin usynatyn saýda kesheni.
Shyńjań jáne Qazaqstan eliniń kásipkerleri arasynda iskerlik kezdesý ótip, onda QHR Shyńjań-Uıǵyr avtonomııaly aýdanynyń iri kompanııalary jáne Abaı oblysynan arnaıy kelgen kásipkerler, bıznes ókilderi arasynda yntymaqtastyq týraly birqatar kelisimge qol qoıyldy.
Budan bólek, Abaı oblysynyń ákimi QKP OK Saıası bıýrosynyń múshesi, QHR Shyńjań-Uıǵyr avtonomııalyq aýdany QKP partııa komıtetiniń hatshysy Ma Sınjýımen kezdesti. Kezdesý barysynda óńirler arasyndaǵy saýda-ekonomıkalyq yntymaqtastyqtyń damýy jan-jaqty saraptaldy.
Basty nazar óńiraralyq yntymaqtastyq máselesine aýdaryldy. Búginde Qazaqstan Shyńjańmen ónerkásip, kólik, logıstıka, aýyl sharýashylyǵy jáne týrızm salasynda úlken tabysqa jetip otyr. Eki aımaqtyń turaqty damýyna yqpal etetin bul yntymaqtastyqty nyǵaıtý men keńeıtýdiń qosymsha múmkindigine basa nazar aýdaryldy.
Óz kezeginde QHR Shyńjań-Uıǵyr avtonomııalyq aýdany QKP partııa komıtetiniń hatshysy Ma Sınjýı Qazaqstan men Qytaı arasyndaǵy tyǵyz ekonomıkalyq qarym-qatynastyń strategııalyq mańyzyna toqtaldy. Ol Shyńjań-Uıǵyr avtonomııaly aýdany týrızmdi damytýǵa, «Tachen-Semeı» tikeleı áýe reısin ashýǵa, sonymen qatar «Bahty» beketinde júk-kólik aǵynyn arttyryp qana qoımaı, sonymen qatar týrısterdiń de qataryna arttyrý úshin beketti jańǵyrtý jumystaryn jedeldetýdiń mańyzyna toqtaldy.
Sonymen qatar Ma Sınjýı Shyńjań-Uıǵyr avtonomııaly aýdanynyń Abaı oblysymen aýyl sharýashylyǵy, geologııalyq zertteý, taý-ken óndirisi, energetıka jáne bilim berý sııaqty strategııalyq mańyzdy salada yntymaqtastyqty tereńdetýge daıyn ekenin aıtty. Kórshi óńir Abaı óńirinen et, astyq, júgeri jáne kúnbaǵys maıyn alýǵa nıet bildirdi. Sondaı-aq jel elektr stantsııasyn salý jáne stýdenttermen almasý múmkindikterin talqylaýǵa daıyn. Osy oraıda jaqyn arada Abaı oblysyna arnaıy QHR Shyńjań-Uıǵyr avtonomııaly aýdanynan arnaıy delegatsııa jiberý josparlanǵan.