Kitapqa Qazaq eliniń on jyldyq shejiresi arqaý bolǵan

ASTANA. 21 qańtar. QazAqparat - Saýytbek Abdrahmanovtyń «Qashaǵan quryqtaǵan Qazaqstan» atty kólemdi jınaǵy oqyrmandardyń qolyna tıdi. Qalamgerlik, qaıratkerlik saparlarmen álemniń elýden astam elin aralaǵan, kóptegen oqıǵalarǵa kýá bolǵan kórnekti pýblıtsıst, fılologııa ǵylymdarynyń doktory Saýytbek Abdrahmanovtyń bul jınaǵyna

2001-2010 jyldar aralyǵyndaǵy sheteldik reportajdary, memleketter basshylarymen, kórnekti qaıratkerlermen, halyqaralyq saıasatqa qatysty suhbattary toptastyrylǵan. Qazaqstannyń syrtqy saıasattaǵy basty-basty oqıǵalary arqaý bolǵan. Kitaptyń ón boıynda avtordyń zaman, qoǵam, adam, el, halyq týraly oılary órilip otyrady.

Eýropadaǵy qaýipsizdik jáne yntymaqtastyq uıymynyń tóraǵasy bıigine kóterilgen, 2010 jyly Uıymnyń Sammıtin óz elimizde ótkizýge qol jetkizip, álemge áıgili memleketke aınalǵan Qazaqstannyń halyqaralyq arenadaǵy alar ornyn aıshyqty ashyp kórsetetin kitapta resmı saparlardyń jaı-japsary baıandalyp qana qoımaıdy, sol elder týraly taǵylymdy jaılar da aıtylady, táýelsizdigimiz jóninde ordaly oılar ortaǵa salynady.

Kitaptyń alǵysózin jazǵan kórnekti memleket jáne qoǵam qaıratkeri, QR Parlamenti Senatynyń Tóraǵasy Qasym-Jomart Toqaev: «Kásibı halyqaralyq dıplomat men úshin bul kitap erekshe qyzyǵýshylyq týǵyzdy. S.Abdrahmanovtyń kitabyn oqyǵan oqyrman, meıli ol stýdent, ǵalym nemese memlekettik qyzmetshi bolsyn, bizdiń qarama-qaıshylyqty álemimiz nemen tynystap, qandaı qıyndyqtardy eńserýge jumylyp jatqanynan, qaı turǵydaǵy synaqtardy jeńýge umtylys tanytqanynan tolyq túsinik alady. Jáne eń bastysy - oqyrmannyń kóz aldynda bizdiń memlekettiń kóshbasshysy Nursultan Ábishuly Nazarbaev bastaǵan onyń halyqaralyq qyzmetiniń tutas bir kartınasy paıda bolady. Jınaqta Elbasymyzdyń álemdik saıasattyń sańlaǵy retindegi bıik beınesi somdalǵan»,- dep bul eńbektiń qundylyǵyn atap ótken.

S.Abdrahmanov Prezıdenttiń halyqaralyq qyzmetin jan-jaqty, kelistirip kórsetý arqyly elimizdiń EQYU tóraǵalyǵyna saılanýy da, 11 jyl boıy shaqyrylmaı kelgen Uıym Sammıtiniń Qazaqstan tóraǵalyǵy tusynda, Astanada ótkizilýi de eń aldymen Elbasy eńbeginiń jemisi ekendigin dáleldep shyqqan.

Qazaqstan Prezıdenti Nursultan Nazarbaevtyń 2001 jyly Shanhaı yntymaqtastyq uıymynyń Sammıtinde kótergen máseleleri men aıtqan usynystary jınaqtyń alǵashqy betterinen oryn alǵan. Elbasynyń 2001 jyly AQSh-qa saparyn, joǵary deńgeıde ótkizgen kezdesýlerin birneshe taqyryppen shyqqan maqalalardan oqýǵa bolady. Memleket basshysy N.Nazarbaevtyń 2002 jyly Ońtústik Afrıka Respýblıkasynda, Iohannesbýrgte ótken Turaqty damý jónindegi búkilálemdik sammıtte sóz sóılep, jahandyq máseleni kótergenin «Turaqty damý adamzattyń aman qalý amaly», «Jahandyq janaıqaı» atty maqalalardan oqyp bilemiz.

Elbasynyń 2003 jyly Shveıtsarııaǵa, Italııaǵa, Vatıkan, Reseı elderine jasaǵan resmı saparynan jazylǵan maqalalar memlekettik máselelerdiń talqylanýynan, ortaq sheshimge kelýdegi saıasatkerliktiń sheberliginen syr shertedi. Sondaı-aq Memleket basshysynyń 2007 jylǵy AQSh-qa, Brazılııaǵa, Túrkııaǵa resmı sapary, sol elderdiń basshylarymen ótken mańyzdy kezdesýlerde kóterilgen máseleler jeke taqyryptar boıynsha kórinis tapqan. Elbasynyń Birikken Ulttar Uıymy Bas Assambleıasynyń 62-sessııasynda sóz sóılep, álem qaýipsizdigi, beıbitshilik týraly aıtqan oılaryn oqyrmanǵa jetkizgen. Jáne de Qazaqstan Prezıdenti Nursultan Nazarbaevtyń 2009-2010 jyldary Japonııa, Koreıa Respýblıkasy jáne AQSh-qa barǵan saparlary jan-jaqty baıandalǵan. 2010 jyly 14 sáýir kúni Vashıngtonda ótken ıAdrolyq qaýipsizdik jónindegi jahandyq sammıttiń birinshi sessııasynda QR Prezıdenti Nursultan Nazarbaev sóz sóıledi. Elbasy Qazaqstan tájirıbesin aıta otyryp, alpaýyt elderdiń basshylaryn ıadrolyq qarýdan bas tartýǵa shaqyrdy.

Kitapta QR Parlamenti Senatynyń Tóraǵasy Qasym-Jomart Toqaev bastaǵan parlamentshilerdiń 2008 jyly Qytaıǵa barǵan sapary «Uly eldiń ulaǵaty» degen taqyrypta berilgen. Sondaı-aq Q.Toqaevtyń Avstrııa, Grekııa memleketterine barǵan issaparlarynan jazylǵan maqalalar saıası máni tereńdigimen erekshelenedi.

Osy jınaqta QR Parlamenti Májilisiniń Tóraǵasy Oral Muhamedjanov bastaǵan parlamenttik delegatsııanyń Vengrııa, Ulybrıtanııa astanalarynda bolǵan saparlary, parlamentaralyq baılanystyń damýy jaıly jazylǵan maqalalarǵa oryn berilgen.

Jáne birqatar maqalalarda sońǵy eki-úsh jylda QR Memlekettik hatshysy - Syrtqy ister mınıstri Qanat Saýdabaevtyń Norvegııa, Ispanııa, AQSh, Aýǵanstan, Avstrııa elderine jasaǵan saparlary, júzdesýlerde qozǵalǵan ǵalamdyq máseleler qamtylǵan.

Avtordyń qoǵam qaıratkeri, Halyq jazýshysy Ábish Kekilbaıulymen 2002 jyly Túrkııa saparynan keıin júrgizgen suhbaty baýyrlas elderdiń bir-birine degen ystyq qarym-qatynasy, saıası-ekonomıkalyq jáne mádenı baılanystarynyń jedel damýy týraly oılardy qamtyǵan. 2003 jyly Nurtaı Ábiqaevpen bolǵan suhbatta kórshiles jatqan Qazaqstan men Reseı memleketteriniń dostyq, mádenı-rýhanı baılanystary sóz bolady.

Jınaqta ár jyldary birqatar memleketterdiń basshylarymen júrgizilgen suhbattarda oryn alǵan. Sonyń ishinde Tájikstan Respýblıkasynyń Prezıdenti Emomalı Rahmonovpen, Arab Respýblıkasynyń Prezıdenti Mohammed Hosnı Múbárakpen, Grýzııanyń burynǵy Prezıdenti Edýard Shevardnadzemen bolǵan suhbattar saıası salmaǵymen erekshelenedi. Tanymal saıasatkerler óz memleketerindegi jáne álemdegi jaǵdaı týraly oılarymen jáne el basqarýdaǵy ózindik ustanymdarymen bólisken.

Kitap Astanadaǵy «Elorda» baspasynan jaryq kórgen. Kólemi 33,5 baspa tabaq.