Kitaphanashylar men arhıv qyzmetkerlerine jumys ornynda qandaı qaýip bar

NUR-SULTAN. QazAqparat – QR Mádenıet jáne sport mınıstri Aqtoty Raıymqulova kitaphanashylar men arhıv qyzmetkerleriniń densaýlyǵyna alańdaýshylyq tanytty, dep habarlaıdy QazAqparat tilshisi.

«Qyzmetkerlerdiń eńbek quqyqtaryn qamtamasyz etýde mádenıet jáne arhıv uıymdary qyzmetkerleriniń eńbek jaǵdaıyn jaqsartý máselesi mańyzdy ról atqarady. Óıtkeni, múldem zııansyz mamandyqtar joq ekeni belgili, bári ózdiginen qaýipti. Osyǵan baılanysty kitaphana júıesi men arhıv qyzmetkerleriniń jumys ornyndaǵy kásibı qaýip-qaterdiń keıbir tustaryn atap ótkim keledi.Barlyq derlik arhıv jáne kitaphana qyzmetkerleri qorda jumys isteý barysynda jáne qaǵaz shańymen baılanysýǵa májbúr», - dedi mınıstr QR Prezıdenti janyndaǵy Adam quqyqtary jónindegi komıssııanyń otyrysynda.

Onyń atap ótýinshe, kitaphanashylardyń jumysy sańyraýqulaqtardyń kóptegen sporalary bar atmosferada ótedi.

Olardyń aǵzaǵa áseri kitaphana qyzmetkerleriniń kóptegen kásibı aýrýlarynyń damýyna yqpal etedi. Búgingi tańda zeń sańyraýqulaqtarynyń adamdar úshin zııandy ekendigi naqty anyqtalǵan.

Kógerýden basqa, kitaphanashynyń densaýlyǵyna kitap shańy qaýip tóndiredi. Ol allergııa, bronh astmasyn týǵyzýy múmkin.

Arhıv mekemelerindegi jumys shań jınaýǵa, sańyraýqulaq vırýstaryn juqtyrýǵa qabileti bar qujattarmen baılanysty. Olar óz kezeginde ártúrli aýrýlardy týdyrady.

«Arhıv qyzmetkerleri árbir qaǵazdyń saqtalýyn jáne qaýipsizdigin qamtamasyz ete otyryp, óndiristik ortanyń kóptegen faktorlaryna ushyraıdy. Bul: jergilikti júkteme, allergen bolyp tabylatyn shań-tozań, qalpyna keltirý jáne dezınfektsııalaý jumystarynda qoldanylatyn hımıkattar», - dedi ol.

Mınıstrdiń dereginshe, zııandy (erekshe zııandy) jáne qaýipti (erekshe qaýipti) eńbek jaǵdaılary bar jumystarmen, atap aıtqanda:

- zeń sańyraýqulaqtaryn, aktınomıtsetter men patogendi mıkrobtardy juqtyrǵan qaǵaz negizindegi qujattarmen, kınoplenkamen jáne fotoplenkamen jumys isteý jáne olardy zııandy hımııalyq eritindilerdi qoldana otyryp, qalpyna keltirý, betindegi zeńdi joıý;

- qaǵaz jetkizgishterdegi qujattardyń jaǵdaıyn dıagnostıkalaý boıynsha jumys;

- mamandandyrylǵan úı-jaılardaǵy aýa jáne qaǵaz ylǵaldylyǵyn retteý jáne basqa da arnaıy tehnologııalyq protsesterdi ózgertý;

- benzınde, dıhloretanda, atsetonda, efırde jáne siltilik eritindilerde óndiristik qondyrǵylar men apparatýralardyń bólshekterin, ydystardy, buıymdardy, materıaldardy qolmen jýý;

- túpteý (tigý) úshin, álsiz kontrastty jáne óshetin mátini bar qujattar boıynsha aqparatty anyqtaý;

- kitaphana jáne mýzeı-qorymen jumys isteý, sondaı-aq zııandy hımııalyq reaktsııalardyń oshaǵyna aınalatyn shań men kirden turatyn teatrlyq dekoratsııa men býtaforııany jasaýmen aınalysatyn qyzmetkerlerge qosymsha aqy qarastyrylǵan.

«Alaıda, joǵaryda kórsetilgen qosymsha aqy qyzmetkerlerge QR Eńbek kodeksine sáıkes «Jumys isteý jumys ýaqytynyń qysqartylǵan uzaqtyǵyna, jyl saıynǵy aqy tólenetin qosymsha eńbek demalysyna jáne eńbekke aqy tóleýdiń joǵarylatylǵan mólsherine quqyq beretin óndiristerdiń, tsehtardyń, kásipter men laýazymdardyń tizimi, aýyr jumystardyń, eńbek jaǵdaılary zııandy jáne (nemese) qaýipti jumystardyń tizbesi» negizinde beriledi. Sonymen qatar, joǵaryda atalǵan tizimde memlekettik arhıv jáne kitaphana mekemeleri qyzmetkerleriniń laýazymdary joq»,- dedi Aqtoty Raıymqulova.