Qystyń qamy: «Býrabaı» ulttyq parkinde 470 tonna shóp jáne 135 myń býma japyraq daıyndaldy

<p>&laquo;Býrabaı&raquo; memlekettik ulttyq tabıǵı parkinde jyldaǵy dástúr boıynsha jabaıy janýarlar men qustardy qystatý úshin qajetti 470 tonna shóp jáne 135 myń býma aǵashtyń japyraǵy daıyndaldy, dep habarlaıdy Kazinform tilshisi.</p>

Janýarlarǵa kútim jasaý «Býrabaı» MUTP qyzmetiniń basym baǵyttarynyń biri bolyp tabylady. Qys aılarynda  tuıaqty jabaıy janýarlarǵa (maral, elik, buǵy, bulan, qaban jáne t.b.) tabıǵı azyqtyń bolýy jaıylymdardyń qarly jáne muzdatylýyna baılanysty aıtarlyqtaı shektelýi múmkin. Sol sebepti, ulttyq park qyzmetkerleri jabaıy janýarlar men qustardy qystatý úshin jyl saıyn jaz-kúz aılarynda qajetti jem-shóp qoryn ázirleıdi.

«Býrabaı» memlekettik ulttyq tabıǵı parki baspasóz qyzmetiniń málimetinshe, shóp park aýmaǵyndaǵy arnaıy bólingen ýchaskelerde shabylady.

Foto: «Býrabaı» memlekettik ulttyq tabıǵı parkinen

- Shabylǵan shóp aldymen keptirilip, keıin jippen orama etip tıeledi. Bul ádis yńǵaıly, óıtkeni ol shópti tıimdi saqtaýǵa jáne tasymaldaýǵa múmkindik beredi. Jaz boıy mekeme qyzmetkerleri qysqa qajetti 470 tonna shóp qory jáne 135 myń býma aǵashtyń japyraǵyn daıyndady. Aǵashtyń japyraqtary olardyń ómir súrýine jáne densaýlyǵyna qolaıly jaǵdaı jasaý úshin daıyndalady. Japyraqtyń quramyna kiretin ósimdikter janýarlarǵa saý as qorytý júıesin saqtaýǵa jáne qysta olardyń dıetasyn baıytýǵa kómektesedi, - dedi vedomstvodan.

«Býrabaı» ulttyq parkiniń quramyna Aqylbaı, Býrabaı, Mırnoe, Temnobor, Zolotobor, Bulandy, Jalaıyr, Barmashyn, Prıozernoe tárizdi on ormanshylyǵy kiredi. Onyń ishinde Aqylbaı, Mırnoe, Prıozernyı ormanshylyqtarda janýarlarǵa jem-shóp salýǵa arnalǵan 15 jańa astaý qoıyldy, 28-i jóndeldi. Qabandarǵa arnalǵan qystyq 15 pana salyndy. Qustarǵa 240 úıshik ornatyldy.

Foto: «Býrabaı» memlekettik ulttyq tabıǵı parkinen

Sonymen birge, jabaıy janýarlardyń mıneraldarǵa, tuzdarǵa jáne basqa da qorektik zattarǵa qol jetkizýin qamtamasyz etý úshin park qyzmetkerleri qys mezgilinde tuzdy sortańdar ornatý boıynsha jumystar júrgizetin bolady. Jyl basynan beri mıneraldy bloktar 15 sortańda ornalastyryldy.

Aıta keteıik, QR Prezıdenti Іs basqarmasyna qaraıtyn «Býrabaı» memlekettik ulttyq tabıǵı park aýmaǵy 129 myń gektardan astam jerdi alyp jatyr.

Foto: «Býrabaı» memlekettik ulttyq tabıǵı parkinen

 

Eske sala keteıik, budan buryn «Býrabaı» ulttyq parkiniń qyzmetkerleri «Qyzyl kitapqa» engen aqqýdy qutqarǵanyn jazǵan edik.