Qysta qarǵa, jazda batpaqqa batamyz: Qoıandy turǵyndary joldy jaýyp tastady

<p>KÓKShETAÝ. KAZINFORM &ndash; Aqmola oblysynyń Qoıandy aýyly turǵyndary sý tasqynyna baılanysty tótenshe jaǵdaı jarııalaýdy talap etip, joldy jaýyp tastady.&nbsp;</p>

Turǵyndardyń sózinshe, biraz turǵyn úı men aýlalarǵa sý kirgen. Sol sebepti, jergilikti aýqymdaǵy tótenshe jaǵdaı engizýdi talap etýde.

Áleýmettik jelide jeldeı esken vıdeoda narazy halyq qysta qar alyp, kóktem men jazda laı-batpaqqa batamyz dep otyr.

Osyǵan baılanysty Aqmola oblysy ákimdiginiń baspasóz qyzmetinen túsinik berdi. Málimetke saı, naýryzdyń 26-y saǵat 20:40 shamasynda Qoıandy aýylynyń 50-ge jýyq turǵyny aýyl ákimdiginiń janyndaǵy joldy jaýyp tastaǵan. Jergilikti turǵyndar sý tasqynyna qarsy is-sharalar máselelerine nazar aýdarý maqsatynda jınalǵan. Narazy turǵyndarmen Tselınograd aýdanynyń ákimi B.Ospanbekov jáne Aqmola oblystyq TJD bastyǵy K. Dospaev kezdesti.

«Saǵat 22:00-de barlyq joldar ashylyp, turǵyndar úılerine taraı bastady. Qazirgi ýaqytta Qoıandy aýylynda sý tasqynyna qarsy kúsheıtilgen is-sharalar júrgizilýde. Shamamen 150 myń tekshe metr qar shyǵaryldy. Sondaı-aq Qoıandy aýylynda 9,5 myń metr aryqtar men kanaldar, 46 sý ótkizý qubyry tazartyldy, 35 myńnan astam tekshe metr erigen qar sýy soryldy. Joldardy jabý sııaqty zańsyz áreketterge jol berilmeıdi. Zańnamany buzǵany úshin jaýapkershilik qarastyrylǵanyna nazar aýdaryńyzdar», - dep túsindirdi ákimdikten.

Aıta ketsek, budan buryn Aqmola oblysynyń ákimi Marat Ahmetjanov Kókshetaýda jertólesin sý basqan mektepke barǵan edi.