Qysqy jasóspirimder olımpıadasynan qazaqstandyqtar osy ýaqytqa deıin qansha medal alǵan

<p>Ońtústik Koreıanyń Kanvondo qalasynda 19 qańtar men 1 aqpan aralyǵynda IV qysqy jasóspirimder olımpıadasy ótedi. Qazirge deıin qazaqstandyq sportshylar atalǵan dodada úsh márte baq synap, barlyǵy bes medal oljalap qaıtqan edi, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Jasóspirimder arasyndaǵy Qysqy olımpıada alǵash ret 2012 jyly Avstrııanyń Insbýrk qalasynda ótkizildi.

Bul jyly bıatlonnyń sprınt túrinen qyzdar arasynda qazaqstandyq Galına Vıshnevskaıa bir kúmis alsa, izbe-iz júrý básekesinde qola júldege qol sozdy.

1994 jyly Semeı qalasynda dúnıege kelgen ol odan keıingi kezeńde de birneshe básekede jeńimpaz bolyp, keıbirinde júldegerler qatarynan kórindi.

2014 jyly jasóspirimder arasynda Azııa chempıonatynda eki márte altyn alsa, 2017 jyly Qysqy Ýnıversıadada eki márte chempıon atandy.

Al 2017 jyly Qysqy Azııa oıyndarynda tórt márte jeńis tuǵyrynan kórindi.

Sondaı-aq, 2012 jylǵy jasóspirimder arasyndaǵy Qysqy olımpıadada qazaqstandyq shańǵyshy Sergeı Malyshev 10 shaqyrymǵa klassıkalyq ádispen jarysýda úzdik úshtikti túıindedi.

Shyǵys Qazaqstan oblysynyń Rıdder qalasynda 1994 jyly dúnıege kelgen shańǵyshy odan keıin 2013 jyly Qysqy ýnıversıadada estafetalyq ádispen 10 shaqyrymǵa jarysta chempıon atandy.

Al 2017 jyly estafetalyq ádispen 7,5 shaqyrymǵa jarysýda kúmis alsa, sol jyly 30 shaqyrymǵa jekeleı synda máre syzyǵyn úshinshi bolyp qıdy.

2016 jyly Norvegııanyń Lıllehammer qalasynda ótkizilgen jasóspirimder arasyndaǵy Qysqy Olımpıada oıyndarynda Qazaqstan qorjynyna eki qola medal tústi.

Mánerlep syrǵanaýdan qyzdar arasynda jekeleı synda Elızabet Tursynbaeva úzdik úshtikten kórindi.

2000 jyly dúnıege kelgen ol keıinnen 2019 jyly álem chempıonatynda áıelder arasynda kúmis medal alsa, sol jyly Qysqy ýnıversıadada da dál sondaı jetistigin qaıtalady.

Ózge de jetistikterge qol jetkizdi. 2021 jyly alǵan jaraqatyna baılanysty sporttyq mansabyn aıaqtady.

Taǵy bir qola júlde bıatlonnyń sprınt túrinen qyzdar arasynda Arına Pantova aldy.

Al 2020 jyly Shveıtsarııanyń Lozanna qalasynda bolǵan jasóspirimder arasyndaǵy Qysqy olımp oıyndarynda qazaqstandyq sportshylar eshqandaı júldege qol jetkize alǵan joq.

Eske salsaq, 2024 jylǵy Qysqy jasóspirimder olımpıadasynda el namysyn 42 sportshy qorǵaıdy.