Qysqy Ýnıversıada: Búgin qazaqstandyq jastar úsh sport túrinen saıysqa túsedi
Aldymen 14:00-de bıatlonnan erler arasynda jekeleı synda Vadım Kýrales, Kırıll Baýer, Erjanat Qýandyq, Nıkıta Akımov saıysqa túsedi.
Al 15:00-de frıstaıl-mogýldan irikteý kezeńinde Anastasııa Gordko, Aıaýlym Ámirenova, Maksım Emelıanov, Fedor Býgakov, Semen Rýsakov, Anton Bondarev jarysqa shyqsa, 18:30-de fınal belgilengen.
Sondaı-aq 17:00-de bıatlonnan áıelder arasynda jekeleı synda Mılana Geneva, Polına Egorova, Alına Skrıpkına, Aısha Rakısheva el namysyn qorǵaıdy.
Saǵat 20:30-de shaıbaly hokkeıden Qazaqstan erler quramasy Ońtústik Koreıa, 20:30-de elimizdiń áıelder quramasy Chehııamen muz aıdynǵa shyǵady.
Aıta ketsek, 13 qańtarda Italııanyń Týrın qalasynda 2025 jylǵy Qysqy ýnıversıadanyń saltanatty ashylý rásimi ótti.
Dúbirli doda 13-23 qańtar aralyǵynda ótedi. Oǵan álemniń 57 elinen 2000-nan astam sportshy qatysady. Jarys baǵdarlamasynda 11 sport túri boıynsha 96 medal jıyntyǵy sarapqa salynady.
Qysqy Ýnıversıadada Qazaqstan quramasynan 103 sportshy 11 sport túri boıynsha baq synaıdy. Olar bıatlon, short-trek, shańǵy jarysy, mánerlep syrǵanaý, qysqy sporttyq baǵdarlaý, frıstaıl, taý shańǵysy, erler jáne áıelder hokkeıi, sondaı-aq parashańǵy jarystary boıynsha synǵa túsedi.