Qysqy Azııa oıyndarynda Qazaqstan sportshylary 51 medal jıyntyǵy úshin kúresedi

<p>ASTANA. KAZINFORM &ndash; Qytaıda ótetin IX qysqy Azııa oıyndaryna Qazaqstannan 138 sportshy barady. Bul týraly Úkimet otyrysynda QR Týrızm jáne sport mınıstri Erbol Myrzabosynov málim etti.</p>

- 2025 jyldyń 7-14 aqpany aralyǵynda Qytaı Halyq Respýblıkasynyń Harbın jáne ıAbýlı qalalarynda 9-qysqy Azııa oıyndary ótedi. Qysqy Azııa oıyndarynyń baǵdarlamasyna 6 sport túri kiredi: konkı sporty, bıatlon, kerlıng, shańǵy sporttary, shaıbaly hokkeı, skı-alpınızm. Jalpy baǵdarlamada 11 sporttyq dıstsıplına qamtylǵan. Oıyndarǵa Azııanyń 32 elinen 1 000-nan astam sportshy qatysyp, 64 medal jıyntyǵy sarapqa salynady, - dedi E.Myrzabosynov.

Onyń aıtýynsha, Qazaqstan quramasy 6 sport túrinen, 10 dıstsıplına boıynsha jarystarǵa qatysady. Komandanyń quramy 138 sportshydan quralǵan (72 er adam jáne 66 áıel). Olar 51 medal jıyntyǵy úshin kúresedi.

- Salystyrmaly túrde qarasaq, 2017 jyly Sapporoda (Japonııa) ótken Azııa oıyndaryna Qazaqstannan 116 adam qatysqan bolatyn. Qazaqstan quramasy 1996 jyldan beri qysqy Azııa oıyndarynda úzdik tórttik qatarynda oryn alyp keledi. 2017 jyly Sapporoda Qazaqstan 32 medal jeńip alyp, jalpy komandalyq esepte 4-oryndy ıelendi. 2025 jyly Harbınge baratyn delegatsııanyń jartysynan astamy Astana, Almaty qalalarynan jáne Shyǵys Qazaqstan oblysynan shyqqan sportshylar. Oıyndarǵa sapaly daıyndyq úshin ulttyq qurama 137 oqý-jattyǵý jıynyn ótkizdi, - dedi mınıstr.

Sonymen qatar, sportshylar 86 halyqaralyq jarysqa qatysty, onda 33 medal jeńip aldy.

Buǵan deıin IX qysqy Azııa oıyndarynyń bıletteri satylymǵa shyqqanyn jazǵan edik.