Kishkentaı oqyrmandar úshin erekshe álem qurylyp jatqanyn baıqaımyn - Ashat Aımaǵambetov

ASTANA. QazAqparat – Óz isine adal, kásibı kitaphanashylardyń kishkentaı oqyrmandarymyz úshin kitaphanadan erekshe bólek álem quryp jatqanyn baıqaımyn. Kitaphanashylardy búgingi kásibı merekesimen quttyqtaǵan Oqý-aǵartý mınıstri Ashat Aımaǵambetov osyndaı oı aıtty, dep habarlaıdy QazAqparat vedomstvo basshynysynyń telegram kanalyna silteme jasap.

«

Óńirlerge issaparmen barǵanda mindetti túrde mektep kitaphanalaryn aralaımyn. Kitaphanashylarmen áńgimelesip, kitaphanalardyń kórkem ádebıetpen qamtamasyz etilýin, jóndeý jáne jabdyqtaý jumystary qalaı júrgizilip jatqanyn tekseremin. Bul sharalardyń barlyǵy Prezıdenttiń tapsyrmasy boıynsha «Oqýǵa qushtar mektep» respýblıkalyq jobasy aıasynda júzege asyrylyp jatyr. Byltyr jobany iske asyrý aıasynda mektep kitaphanalaryna 2 mln astam kitap satyp alynsa, bıyl 1,5 mln kitap jetkizildi. Bul – otandyq jáne álem ádebıeti. Sondaı-aq, ǵylymı fantastıkaǵa da kóp kóńil bólip jatyrmyz. Aızek Azımov, Reı Bredberı, aǵaıyndy Strýgatskıı jáne basqa avtorlardyń shyǵarmalary qııaldyń, oıdyń damýy úshin óte mańyzdy. Jyl saıyn balalar kórkem ádebıetin satyp alýdyń arqasynda baspagerler olardy memlekettik tilge aýdarýǵa belsene kiriskeni qýantady

«, - dep jazady mınıstr.

Ol oqýshylardy kitap oqýǵa baýlý, olardyń kitapqa degen súıispenshiligin oıatý óte mańyzdy ekenine toqtalady.

«

Árıne, bul jumystyń barlyǵy kitaphanashylardyń eńbeginsiz múmkin emes. Búgingi tańda elimizdiń mektepterinde 8 myńǵa jýyq kitaphanashy (7 841) jumys isteıdi. Balalarmen til tabysý, olardy kitap oqýǵa baýlý, jaryq kórgen úlken ádebıetter aǵynyn sharlaý, kitap qoryn bilý jáne oqýshylar men kolledj stýdentterine kitap oqýǵa keńes berý – úlken ıntellektýaldy jumys. Áriptesterimmen áńgimeleskende óz isine adal, kásibı kitaphanashylardyń kishkentaı oqyrmandarymyz úshin kitaphanadan erekshe bólek álem quryp jatqanyn baıqaımyn. Búgingi mereke – osy mamandyqtyń qanshalyqty mańyzdy ekenin moıyndaý. Oqýshylar men stýdentter eńbekterińizdi joǵary baǵalaıtynyna senimim mol. Kásibı mereke qutty bolsyn, qurmetti áriptester!

» - deıdi Ashat Aımaǵambetov.

Eske salsaq, jýyrda Úkimet «Kitaphanashylar kúni» jańa kásibı merekesin bekitti. Búgin elimizdegi 19 myń kitaphanashy tuńǵysh ret kásibı merekesin atap ótti.