Kishigirim janar-jaǵarmaı quıý stansalary benzınge túrli qospalar qosýǵa májbúr
«KNPZ» JShS-nyń basqarýshy dırektory Dáýlet Qalıhanovtyń aıtýynsha, búginde elimizde 4700-ge jýyq janar-jaǵarmaı quıý stansasy bar. Onyń ishinde jumys istep turǵany shamamen 4300. Munyń 326-sy QazMunaıgazǵa, 270-si Gelıosqa jáne 131-i Sınoılǵa tıesili.
«Biz kompanııamyzdy Energetıka mınıstrliginiń munaı ónimderin bólý kestesine qosý esebinen QazMunaıGaz,Gelıos, Sınoıldan keıingi eń iri tórtinshi JQS retinde olarmen birdeı tipti shalǵaı óńirlerdegi janar-jaǵarmaı quıý stansalaryn janarmaımen qamtamasyz etýdi maqsat etken edik. Qyrkúıek aıynda bizdi Energetıka mınıstrligi bólý kestesine qosty. Bizdiń seriktestik jelimizdiń jalpy tutyný kólemi shamamen 80 myń tonnany quraıdy. Ótinish berilgen kólemniń tek 1660 tonnasyn ǵana aldyq. Bul tek Ońtústik Qazaqstan oblysyna ǵana qajettiliktiń nebári 2 paıyzyn quraıdy»,- dedi ol.
Onyń sózine qaraǵanda, QazMunaıGaz bolsa 78 myń, Geloıs 36 myń, Sınoıl 41 myń tonna janarmaı alǵan.
«Mundaı tómen kólem alǵannan keıin bul jaıt bizdiń naryqtaǵy jańa oıynshy ekendigimizge jáne bólý kestesine alǵash ret qatysyp otyrǵanymyzǵa baılanysty shyǵar, kelesi aıda durystalar dep oıladyq. Alaıda, qazan aıynda birde-bir tonna benzın bólingen joq. Qazirgi ýaqytta Energetıka mınıstrligi muny Pavlodar men Shymkent munaı óńdeý zaýyttarynda josparly jóndeý jumystarynyń bastalýymen túsindirýde»,- dedi D.Qalıhanov.
Degenmen, onyń aıtýynsha, joǵaryda atalǵan úsh alpaýyt kompanııa qyrkúıek aıynan da joǵary kólemde munaı ónimderin alǵan. «Bizderge resýrstardyń qandaı jolmen bólinetindigi túsiniksiz», - dedi ol.
Al «KNPZ» JShS dırektorynyń orynbasary Amanaı Mahmetovtyń aıtýynsha, Energetıka mınıstrliktiń kestesine sáıkes janarmaı ala almaǵandyqtan kóptegen mekemeler ony kórshi elderden satyp alýǵa májbúr.
«Kórshi elderde janarmaı bizben salystyrǵanda 15-20 paıyzǵa qymbat. Sol sebepti kishigirim janar-jaǵarmaı quıý stansalary janarmaıǵa túrli qosparlar qosýǵa májbúr. Sondyqtan olardyń janarmaılary sapasyz bolyp otyr», - dedi ol.