Kishi Taldykól saqtalyp qalady – Ekologııa mınıstrligi

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Serikqalı Brekeshev elordadaǵy Kishi Taldykól týraly suraqtarǵa jaýap berdi, dep habarlaıdy QazAqparat tilshisi.

«Biz zertteý jumystaryn júrgizdik. Qazirgi ýaqytta bul kóldi tolyqtyratyn qaınar kózderi joq ekenin túsinemiz. Sondyqtan da tabıǵı túrde qurǵap jatyr. Bolashaqta bul kóldi qosymsha tolyqtyryp otyrmasa, tutastaı qurǵaý qaýpi bar. Biz qala ákimdigimen birneshe ret kezdesip, tikeleı Taldykóldiń qasynda kóshpeli keńester ótkizdik. Tolyqtyryp otyrmasa bul kól jaqyn arada qurǵap ketetinin túsinemiz. Buǵan birneshe faktorlar, sonyń ishinde belsendi qala qurylysy da yqpal etedi», - dep jaýap berdi mınıstr Ortalyq kommýnıkatsııalar qyzmetinde.

Degenmen, mınıstr atap ótkendeı, Kishi Taldykól sý nysany retinde saqtalyp qalady.

«Bul kóldiń aýdany 20 gektardan kem bolmaıdy. Ákimdik taǵy qosymsha zertteýler júrgizedi. Bul kóldiń eń úlken jáne tereń bóligi saqtalyp qalady. Qalǵan bóliginde – kóldiń aınalasynda rekreatsııalyq aımaq uıymdastyrylady», - dep tolyqtyrdy spıker.

Mınıstr ákimdik esebinen kóldiń naqty shekaralary anyqtalatynyn atap ótti.

«Kóldiń túbin tunba balshyqtardan tazartý jumystar júrgiziledi jáne qoldan sý toltyrylady. Sondyqtan, jaqyn arada Taldykól men onyń aınalasyndaǵy rekreatsııalyq aımaqtar uıymdastyrylatyn bóligi qala turǵyndary úshin óte jaqsy demalys orny bolady dep oılaımyn», - dedi Serikqalı Brekeshev.