Kishi Araldan aıyrylyp qalý qaýpi bar - depýtat
Depýtat 2005 jyly «Syrdarııa arnasyn retteý jáne Kishi Araldy qutqarý» jobasy aıasynda Kókaral bógeti salynǵanyn eske saldy. Bul «Ǵasyr jobasy» respýblıkalyq bıýdjet pen Dúnıejúzilik bank esebinen qarjylandyryldy. Alaıda, búgingi tańda bógettiń 200 metrin sý shaıyp ketken jáne bul ýchaske jedel jóndeýdi qajet etedi.
«Jobanyń smetalyq qujattamasy daıyndalyp, bıyldyń tamyz aıynda memlekettik saraptamanyń oń qorytyndysy alyndy. Jobanyń quny – 4 mlrd 582 mln teńge. Bıyl qyrkúıek aıynda respýblıkalyq bıýjettik komıssııanyń otyrysynda Sý resýrstary komıtetiniń bıýdjetin qaıta baǵyttaý esebinen jobany iske asyrýdy bastaýǵa Ekologııa, geologııa jáne tabıǵı resýrstar mınıstrligine 500 mln teńge bólindi. Alaıda, 2023 - 2025 jyldarǵa arnalǵan respýblıkalyq bıýdjette osy jobany qarjylandyrýǵa qarajat qarastyrylmaǵan. Prezıdenttiń Kókaral bógetin nyǵaıtýǵa qatysty berilgen tapsyrmasy eskerýsiz qalǵan»
, - dedi senator Úkimet basshysy Álıhan Smaıylovtyń atyna joldaǵan saýalynda.
Depýtattyń aıtýynsha, eger de qazir Kókaral bógetin qutqaryp qalmasaq, bul jaǵdaı ekologııalyq apatqa ushyratady, ıaǵnı búginde 27 mıllıard tekshe metr sý jınalǵan Kishi Araldan aıyrylyp qalýymyz múmkin.
«Osy oraıda, jobanyń aýqymdylyǵy men mańyzdylyǵyn eskere otyryp, 2023 - 2025 jyldarǵa arnalǵan respýblıkalyq bıýdjet aıasynda qurylys jumystaryn aıaqtaýǵa qalǵan 4 mlrd 80 mln teńge bólinýin qamtamasyz etýińizdi suraımyz», - dedi Murat Baqtııaruly.
Foto: silkadv.com